به‌ پێی راپۆرتی راگه‌یاندنی گشتی دووه‌مین فێستیڤاڵی سلێمانی بۆ فیلمی كوردی، كاتژمێر 3 دوانیوه‌رۆی دوێنێ دووشه‌مه‌ 28 دیسێمبه‌ر سه‌ره‌تا فیلمی سینه‌مایی "منداڵانی دیاربه‌كر" له‌ ده‌رهێنانی "مێراز بازه‌ر" له‌ باكووری كوردستان له‌ هۆڵی رۆشنبیری شاری سلێمانی نمایش كرا و پاشان رێوره‌سمی كۆتایی دووه‌مین خولی فیستیڤاڵی فیلمی كوردی سلێمانی به‌رێوه‌چوو. .

له‌م رێوره‌سمه‌دا سه‌ره‌تا وتاری كۆتایی فیستیڤاڵ له‌ لایه‌ن به‌رێوه‌به‌رانی دووه‌مین فێستیڤاڵی سلێمانی بۆ فیلمی كوردی خوێندرایه‌وه‌ و پاشان 5 هونه‌رمه‌ندی به‌ئه‌زمونی هونه‌ری دراما و سینه‌مای كوردی به‌ ناوه‌كانی؛ "ئه‌خته‌ر كه‌ریم"، "جه‌لیل زه‌نگه‌نه‌"، "عه‌لی توانا"، "عه‌لی نووری" و "مسته‌فا ئه‌حمه‌د" كه‌ ته‌مه‌نێكیان له‌ رێی هونه‌ردا به‌خشیوه‌ و كاری باشیان پێشكه‌ش میلله‌ته‌كه‌یان كردووه‌ له‌ لایه‌ن به‌رێوه‌به‌رانی فیستیڤاڵه‌وه‌ خه‌ڵات كران. .

له‌ كۆتایی ئه‌م رێوره‌سمه‌دا وتاری ئه‌ندامانی لێژنه‌ی داوه‌رانی دووه‌مین فێستیڤاڵی سلێمانی بۆ فیلمی كوردی خوێندرایه‌وه‌ و پاشان له‌ 10 به‌شی جۆراوجۆردا خه‌ڵاتی ئاسكی ئاڵتوون به‌سه‌ر هونه‌رمه‌ندانی سه‌ركه‌وتوو دابه‌شكرا. .

ناوی به‌شه‌كان و فیلمسازانی سه‌ركه‌وتووی ئه‌م فیستیڤاڵه‌ بریتین له‌: 1ـ باشترین سیناریۆ:
خه‌ڵاتی ئاسكی ئاڵتوونی ئه‌م به‌شه‌ به‌خشرا به‌ ساڵم سڵه‌واتی بۆ نووسینی سیناریۆی كورته‌ فیلمی "خه‌ونه‌ به‌فرییه‌كان" له‌ شاری سنه‌. .

2ـ باشترین ده‌رهێنان:
خه‌ڵاتی ئاسكی ئاڵتوونی ئه‌م به‌شه‌ به‌خشرا به‌ سۆران فه‌هیم بۆ سازكردنی كورته‌ فیلمی "یه‌كێك بوو یه‌كێك نه‌بوو" له‌ شاری سنه‌. .

3ـ باشترین وێنه‌گرتن:
خه‌ڵاتی ئاسكی ئاڵتوونی ئه‌م به‌شه‌ به‌ هاوبه‌شی به‌خشرا به‌ ساڵم سڵه‌واتی بۆ وێنه‌گرتنی كورته‌ فیلمی "خه‌ونه‌ به‌فرییه‌كان" له‌ شاری سنه‌ و هه‌روه‌ها سیروان محه‌مه‌د بۆ وێنه‌گرتنی كورته‌ فیلمی "سی 30" له‌ شاری سلێمانی. .

4ـ باشترین فیلمی تایبه‌تی منداڵان:
خه‌ڵاتی ئاسكی ئاڵتوونی ئه‌م به‌شه‌ به‌خشرا به‌ جه‌لال نه‌سیری بۆ سازكردنی كورته‌ فیلمی "زه‌وی فوتباڵ" له‌ شاری سنه‌. .

5ـ باشترین ده‌نگ و میكساژی ده‌نگ:
خه‌ڵاتی ئاسكی ئاڵتوونی ئه‌م به‌شه‌ به‌خشرا به‌ ئه‌حمه‌د ناتیق بۆ ده‌نگ و میكساژی ده‌نگی كورته‌ فیلمی "سی 30" له‌ شاری سلێمانی. .

6ـ باشترین ئه‌كته‌ری كور:
خه‌ڵاتی ئاسكی ئاڵتوونی ئه‌م به‌شه‌ به‌خشرا به‌ ئاسۆ شێره‌به‌یانی بۆ رۆڵ بینین له‌ كورته‌ فیلمی "سێمینار" له‌ وڵاتی به‌ریتانیا. .

7ـ باشترین ئه‌كته‌ری كچ:
خه‌ڵاتی ئاسكی ئاڵتوونی ئه‌م به‌شه‌ به‌خشرا به‌ هێرۆ عه‌زیز بۆ رۆڵ بینین له‌ كورته‌ فیلمی "سی 30" له‌ شاری سلێمانی. .

8ـ باشترین مۆنتاژ:
خه‌ڵاتی ئاسكی ئاڵتوونی ئه‌م به‌شه‌ به‌خشرا به‌ خاتوو "یۆڤان لی" بۆ مۆنتاژ كردنی كورته‌ فیلمی "سێمینار" له‌ وڵاتی چین. .

9ـ خه‌ڵاتی تایبه‌تی لێژنه‌ی داوه‌ران:
خه‌ڵاتی ئاسكی ئاڵتوونی ئه‌م به‌شه‌ به‌خشرا به‌ كورته‌ فیلمی "یه‌كێك بوو یه‌كێك نه‌بوو" له‌ ده‌رهێنانی سۆران فه‌هیم له‌ شاری سنه‌. .

10ـ باشترین میوزیكی داندراوی فیلم:
خه‌ڵاتی ئاسكی ئاڵتوونی ئه‌م به‌شه‌ به‌خشرا به‌ كاروان محه‌مه‌د بۆ دانانی میوزیكی كورته‌ فیلمی "راسپارده‌" له‌ شاری سلێمانی. .

دووه‌مین فێستیڤاڵی سلێمانی بۆ فیلمی كوردی به‌ به‌شداری به‌رهه‌می سینه‌ماكارانی كورد له‌ وڵاتانی ئێران، عێراق، توركیا، به‌ریتانیا و هه‌رێمی كوردستان و به‌ نمایش كردنی 4 فیلمی بڵندی سینه‌مایی و 28 كورته‌ فیلم له‌ دوو به‌شی پێشبركێی و ده‌ره‌وه‌ی پێشبركێی له‌ رۆژانی 20 تا 28ی دیسێمبه‌ری 2009 له‌ هۆڵی رۆشنبیری شاری سلێمانی به‌رێوه‌چوو. .

به‌رێوه‌به‌رایه‌تی راگه‌یاندنی گشتی دووه‌مین فێستیڤاڵی سلێمانی بۆ فیلمی كوردی.