له‌م کۆبوونه‌وه‌یه‌دا که‌ چه‌ند مامۆستای به‌ڕیز قسه‌یان ده‌کرد و ده‌یانویست بێشه‌رعی پرسه‌ بۆ خه‌ڵک روون که‌نه‌وه‌ و ئه‌وه‌ی که‌ له‌ سه‌ره‌خۆشیه‌کاندا‌ به‌ بێشه‌رعی ده‌کری شی بکرێته‌وه،‌ تا قسه‌ی له‌سه‌ر بکرێ و رێگه‌ چاره‌یه‌کی گونجاوی بۆ دیاری بکه‌ن. تا هه‌موو که‌س له‌مه‌وبه‌دوا له‌ سه‌ره‌خۆشیه‌کانیاندا به‌ڕێوه‌ی به‌رن. به‌ڵام به‌داخه‌وه‌ یه‌کێک له‌ مامۆستایان که‌ زۆربه‌ی ژیان و باوه‌ڕی ئێمه‌ به‌ بێشه‌رعی ده‌زانێ،ئه‌مجاره‌ش نان و چایی سه‌ره‌خۆشی به‌ حه‌رام ناو برد و وتی ئه‌م نان و چێشت خواردنه‌ هه‌مووی حه‌رامه‌. که‌ له‌ لایه‌ن ئیمام جومعه‌ی سه‌رده‌شت و چه‌ند مامۆستایه‌کی دیکه‌وه‌ به‌رپه‌رچ درایه‌وه‌ که‌ حه‌رام نییه‌ و ره‌نگبێ ئه‌مڕۆ مه‌کرووهی تێکه‌ڵاو بووبێ. مامۆستایه‌کی دێکه‌ش له‌ قسه‌کانیدا پووڵ وه‌رگرتنی به‌ گومرگی برایم خه‌لیل ده‌شوبهێنێ که‌ هه‌ر که‌س دێته‌ ژوور پووڵی لێوه‌رده‌گرن و هه‌ر که‌س ده‌ڕواته‌ ده‌ر پووڵی لێوه‌رده‌گیرێت. که‌ مه‌به‌ستی هه‌ر دوو مامۆستای ئازیز ئه‌وه‌ بوو که‌ نان و چایی خواردن له‌ سه‌ره‌خۆشیاندا نه‌مێنێ. چه‌ند رۆژ دوای‌ کۆبوونه‌وه‌که‌ راگه‌یه‌ندراوێک بڵاو کرایه‌وه‌ که‌ چه‌ند خاڵی زۆر سه‌یر و سه‌مه‌ره‌ی تێدا هاتبوو. نووسه‌ری بڵاوکراوه‌که‌ نان و چایی خواردن له‌ پرسه‌ و سه‌ره‌خۆشیدا به‌ کارێکی بێشه‌رعی ده‌زانی و ده‌ڵی ئه‌وه‌ به‌پێچه‌وانه‌ی شه‌رع و سوننه‌ته‌. لێره‌دا چه‌ند پرسیارێک دێنه‌ پێش.‌ مامۆستای خۆشه‌ویست و زانا، به‌ کام شه‌رع و فتوا سفره‌ی پێشووت به‌ بێشه‌رعی دانا له‌ کاتێکدا ئێمه‌ی سه‌رده‌شتی به‌ دڵخواز و مه‌یلی خۆمان سفره‌مان دێنا بۆ پرسه‌ی ئێوه‌؟ له‌ کام شه‌رع و فتوادا خواردنی پڵا و گۆشت و مامر حه‌رام کراوه‌ به‌ هۆی ئه‌وه‌ی که‌ ده‌ست کورت و هه‌ژار ناتوانێ بیخوا؟ مامۆستای به‌ڕێز ئه‌گه‌ر سفره‌ و نان خواردن له‌ پرسه‌دا حه‌رام و بێشه‌رعییه‌ بۆ کاتی لابردنی سفره‌ی سه‌ره‌خۆشی به‌ خه‌ڵکتان نه‌ده‌گووت موسوڵمانینه‌ ئه‌وه‌ کارێکی حه‌رامه‌ و مه‌یکه‌ن، ئه‌وه‌ی که‌ تا ئێستا کراوه‌ بێشه‌رعی بووه‌‌ و ئه‌و مامۆستایانه‌ی له‌ پێش ئێمه‌دا بوون نه‌یانزانیوه‌ که‌ حه‌رامه‌ و شاره‌زای شه‌رع نه‌بوون ؟!! بۆ کاتێک سفره‌تان خڕکرده‌وه‌ به‌ قه‌ولی خۆت مامۆستای ئازیز، گومرگی برایم خه‌لیلت بۆ داناین ؟!! بۆ سفره‌ی بێشه‌رعیت به‌ گومرگ گۆڕیه‌وه‌ ؟!! بۆ هه‌تا دوێنێ سفره‌ و پووڵ خرکردنه‌وه‌ حه‌ڵال و زه‌ڵاڵ بوو به‌ڵام ئه‌مڕۆ بۆته‌ حه‌رام و بێشه‌رعی ؟!! مامۆستایانی زێده‌ ئازیز، هه‌یئه‌ت ئۆمه‌نای ماندوونه‌ناس و ... بۆ دوێنێ له‌ سه‌ر سفره‌ی سه‌ره‌خۆشیان هه‌موو پێکه‌وه‌ تێر ده‌مانخوارد و که‌س نه‌یده‌گووت حه‌رامه،‌ ئه‌م شه‌رعه‌ بۆ تا ئه‌مڕۆ که‌س نه‌یدیبوو، چۆنه‌ ئه‌مڕۆ له‌پڕ چاوتان که‌وته‌ کتێبه‌ شه‌رعییه‌کان و 1و2 و3 و... ده‌لیل و بورهانتان بۆ هێناینه‌وه‌ که‌ ناڕه‌وایه‌ و بێشه‌رعییه‌ و نا بۆ که‌لامی خوای گه‌وره‌یه‌ ؟!! بۆ که‌سێک به‌ پووڵی خۆی و به‌ مه‌یل و گه‌ردن‌ئازایی له‌ میواندارییه‌کدا ده‌عوه‌تمان بکات تا ملان ده‌یخۆیین حه‌رام نییه‌ به‌ڵام هه‌ر ئه‌م که‌سه‌‌ له‌ پرسه‌ی ئازیزانیدا نانه‌که‌ی حه‌رام و خواردنه‌که‌ی بێشه‌رعییه‌ ؟!! ئێوه‌ باس له‌ جیاوازی چینایه‌تی له‌ کۆمه‌ڵگادا ده‌که‌ن،به‌ڵام بۆ ئێوه‌ له‌ خانووی چه‌ند تاقی داده‌ژین له‌ کاتێکدا که‌ ته‌نیا پێویستیتان به‌ تاقێکه‌؟ بۆ ئێوه‌ باشترین رانک‌وچۆغه‌ له‌به‌ر ده‌که‌ن و کڵاش ده‌که‌نه‌ پێتان به‌ڵام نابینن هه‌ر مامۆستای ته‌نیشت خۆتان له‌ گڕوتینی گه‌لاوێژدا پاته‌ی له‌ پێیه‌ و چۆغه‌که‌ی سپی هه‌ڵگه‌ڕاوه‌ و ره‌نگی پێوه‌ نه‌ماوه‌، بۆ و سه‌دان بۆی دیکه‌ هه‌ن که‌ باس له‌ جیاوازی چینایه‌تی ده‌که‌ن و که‌س متته‌قی لێ ده‌رنایه‌ت. له‌ خاڵی دووهه‌مدا ئاماژه‌ به‌وه‌ کراوه‌ که‌ مامۆستایه‌ک له‌م خاڵانه‌ لابدات ده‌بێ سه‌رکۆنه‌بکرێ و به‌ توندی سزابدرێ، ئه‌وه‌ جێی ره‌خنه‌یه‌، ئه‌مڕۆ هه‌ر له‌ شاره‌که‌ی خۆماندا که‌سانێک به‌ ناو مه‌لا و مامۆستا سه‌دان فتوای حه‌رام و نابه‌جێ ده‌ده‌ن و بێ‌ئه‌مری خوا و پێغه‌مبه‌ره‌که‌ی (د.خ) ده‌که‌ن، هه‌ر رۆژه‌ روکنێک له‌ عیبادات لاده‌درێ و به‌شێکی نوێ دێته‌ نێو باسان و که‌س ده‌نگی ده‌رنایه‌ت چۆنه له‌ سه‌ر بێ‌ئه‌مری ئێوه‌ ده‌بێ سزا بدرێن و سه‌رکۆنه‌ بکرێن؟‌

رێ‌وڕه‌سمی پرسه‌ و سه‌ره‌خۆشیه‌کانی ئێمه‌ وه‌ک زۆربه‌ی کاره‌کانمان ره‌نگبێ ئه‌مڕۆ پێویست بێ ئاڵوگۆڕێکیان تێدا پێک بێت، ده‌ست خۆشی بۆ ئه‌م که‌سانه‌ که‌ به‌ره‌وپیری ده‌چن و چاره‌سه‌ری کێشه‌کان ده‌که‌ن. به‌ڵام با هه‌موو به‌یه‌که‌وه‌ وه‌ک موسوڵمانێکی راسته‌قینه‌ ته‌نیا گوێ له‌ مستی مامۆستایانی دڵسۆز و کارزان و پێبه‌ندی دینی ئیسلام بین و مامۆستایانیش زیاتر له‌ هه‌میشه‌ پێداگری له‌ سه‌ر شه‌رع و یاسای ئیسلام بکه‌ن و له‌ سه‌ر هه‌ڵسه‌نگاندنی کار و کرده‌وه‌کان به‌ شه‌رعی و بێشه‌رعی زیاتر ورد ببنه‌وه‌ تا خوانه‌خواسته‌ حه‌ڵاڵمان لێ حه‌رام نه‌که‌ن و حه‌راممان بۆ حه‌ڵاڵ نه‌کرێت.