داوا كاریه‌كه‌ی د.قه‌ڕزاوی له چه‌ند سۆنگه‌وه سه‌رنج راكێشه؛

یه‌كه‌م: پێداچوونه‌وه‌ی قه‌ڕزاوی به سه‌ر بیرو بۆچوونه‌كانی رابردووی خۆی له سه‌ر كورد به تایبه‌ت له كوردستانی ژێر ده‌سه‌ڵاتی تیرۆریست‌په‌روه‌ری سه‌ددام حوسێنی له ناوچووه‌وه.قه‌ڕزاوی كه یه‌كێكه له گه‌وره‌ترین كه‌سایه‌تییه‌كانی كۆمه‌ڵگای سووننی و (اخوان المسلمین) له كاتی ده‌سه‌ڵاتی سه‌ددام حوسێن، به بێده‌نگی خۆی به‌رانبه‌ر به كرده‌وه نائینسانیه‌كانی زۆردارانی حاكم به سه‌ر عێڕاقدا بیروڕا به‌شه‌ردۆستانه‌ و ئیسلامیه‌كه‌ی خۆی به گه‌لی كورد نیشاندابوو. هه‌ر چه‌ند كه‌سایه‌تییه‌كی وه‌ك قه‌ڕزاوی هه‌ڵوێست و راده‌ربڕینه‌كانی ناكرێت ته‌نیا وه‌ك بۆچوونی شه‌خسی خۆی هه‌ڵسه‌نگێندرێن به‌ڵكوو ده‌كری بۆچوونی عوله‌مای موسوڵمانانی عه‌ڕب و بزووتنه‌وه‌ی ئیخوان(اخوان المسلمین)یش بێت. هه‌ر ئه‌و گه‌وره پیاوانه بوون كه سه‌ددامی فاشیستیان وه‌ك سه‌ركرده‌یه‌كی نیشتمان په‌روه‌ری بلیمه‌ت و هه‌ڵكه‌وتوو ده‌ناساند و له كاتی له سێداره‌دانیشی ناڕه‌زایه‌تی تووندی خۆیان و حیزبه‌كه‌شیان راده‌گه‌یاند. به‌ڵام ئه‌مڕۆ قه‌ڕزاوی په‌نا ده‌با بۆ كورد كه نه‌هێڵێ عه‌ڕه‌بی سووننی ده‌سه‌ڵات له ده‌ست بدا. دوكتوور قه‌ڕزاوی ده‌یهه‌وی به كورد بڵێ واباشه ئێوه‌ش هه‌رچی له ده‌ست ئه‌و عه‌ڕه‌به‌ سووننییانه‌ له رابردوودا كێشاوتانه له بیر به‌رنه‌وه و ئێستا به‌رانبه‌ر به شیعه راوه‌ستن بۆ وه‌دیهینانی ئامانجی به‌رزی ئیسلام و موسوڵمانان ته‌نیا له ژێر ده‌سه‌ڵاتی عه‌ڕه‌بی سووننی‌دا.

دووهه‌م: شكستی فتوا ده‌رانی خۆكووژی و وه‌خۆ هاتنه‌وه‌یه‌كی كاریكاتۆرانه‌ی موفتیه‌كان بۆ چاره‌سه‌ر كردنی كێشه‌كان له رێگه‌ی دیالۆگ و نێوبژیوانییه‌وه له عێڕاقدا. هه‌ر فتواكانی د.یوسف قه‌ڕزاوی بوون كه نه‌ته‌وه‌ی عه‌ڕه‌بی هان ده‌دا بۆ پشگیری له تیرۆریستانی ئه‌لقاعیده له ئه‌فغانستان و عێڕاق و وڵاتانی دیكه‌دا بۆ گه‌یشتن به حكومه‌تێكی وه‌هابی تووندئاژۆ كه گوێ له مستی شێخ نشینه‌كان بن.هه‌ر ئه‌وانه بوون لاو و جوانه‌ تازه‌پێگه‌یشتوه‌كانیان فتوا ده‌دا كه به نییه‌تی خێر بۆ به‌هه‌شتی خوای گه‌وره خۆ فیدای ئیسلام بكه‌ن تا له‌م رێگه‌یه‌وه بتوانن رێ خۆشكه‌ری ده‌سه‌ڵاتی سیاسی حیزبه‌كه‌یان بن.

سێهه‌م:د.قه‌ڕزاوی دووباره تووشی هه‌ڵه ده‌بێته‌وه‌ و له داواكاریه‌كه‌یدا ده‌یهه‌وێ رۆڵی شه‌ڕكه‌ران و تیرۆریسته‌كانی ئه‌لقاعیده له عێڕاقدا وه‌شارێ و هه‌موو خه‌تاكان بداته پاڵ عه‌ڕه‌بی شیعه‌وه. قه‌ڕزاوی ده‌ڵێ سووننییه‌كان ناوبژی كورده‌كان وه‌رده‌گرن چوونكه "ئه‌وان مه‌زڵومن و ده‌ست درێژییان لێكراوه‌... هه‌ر ئه‌هلی سوننه‌ن له‌ ماڵه‌كانیان ده‌فڕێنرێن...هه‌ر ئه‌وانن سه‌ریان لێده‌كرێته‌وه‌ و له‌ ڕێگاو كه‌لاوه‌كان فڕێ ده‌درێن". ئه‌وه‌ش چه‌واشه‌كارییه‌كی زۆر روون و ناڕاستییه‌كی ئاشكرایه،ئه‌گه‌ر تیرۆریستانی شیعه عه‌ڕه‌بی سووننی ده‌كووژن،پیاوكووژانی سوونی شیعه‌ش ده‌كووژن و كورده‌كانیش له رۆژی جه‌ژنی قورباندا تیرۆر ده‌كه‌ن.له راستیدا شه‌ڕی نێوخۆیی شیعه و سووننی له عێڕاقدا ده‌توانی هۆكاری ده‌ره‌كی هه‌بێت كه زۆر دوور نی‌یه سه‌رچاوه‌كانیشی هه‌ر ئه‌م فتوا ئاژاوه‌گێڕانه‌ی فتوا ده‌ران بێت.

نه‌ته‌وه‌ی كورد زۆر زیاتر له عه‌ڕه‌به‌كانی ئه‌مڕۆ حه‌قی خوراوه و زوڵم و زۆری لێ كراوه،به سه‌دان هه‌زار كه‌سی زینده به‌گۆر و ئه‌نفال كراوه.هه‌زاران كه‌سی شیمیاباران و به‌دار داكراوه.زۆر رۆڵه‌ی شه‌هید و گوله‌باران كراوه.زۆر كوردی موسوڵمان چه‌وسێندراوه‌ته‌وه‌.به‌ڵام هیچ كات قه‌ڕزاویه‌كان ده‌نگیان ده‌رنه‌هاتووه و به‌سه‌ر زاڵم و خوێنڕێژه‌كانیشدا نه‌هاتوونه‌وه.دیكتاتۆر و فاشیسته نه‌ماوه‌كانیش هه‌ر به بێده‌نگی و پشتیوانی ئه‌و گه‌وره‌پیاوانه پشگه‌رم بوون و له سه‌ر كرده‌وه نائینسانیه‌كانیان چالاكتر بوون. بۆ ئه‌و كات كه ده‌سه‌ڵات له ده‌ست عه‌ڕه‌بی سووننی دابوو قه‌ڕزاوی داوای له سه‌ددام و داروده‌سته‌كه‌ی نه‌ده‌كرد ده‌ست له كورد كوژی هه‌ڵگرن؟ بۆ به‌رانبه‌ر به زوڵم و زۆری ده‌سه‌ڵاتدارانی ناموسوڵمان به‌رانبه‌ر به كوردی موسوڵمان، فتوای جیهادی دیفاعی نه‌دا؟ بۆ له شه‌ڕی براكووژی كورده‌كاندا قه‌ڕزاوی داوای نێوبژیوانی نه‌كرد؟ بو ئه‌وكات كه كورد هیچ په‌نایه‌كی نه‌بوو قه‌ڕزاوی كوردیشی نه‌ده‌ناسی؟ به‌ڵام به خۆشیه‌وه ئه‌مڕۆ كه رۆڵه‌كانی كورد قورسایی خۆیان له ناوچه‌دا نیشانداوه قه‌ڕزاوی و هه‌موو گه‌وره حیزبییه‌كانیش هانایان بۆ ده‌به‌ن و داوای هاوكاری و نێوبژیوانی و كوژاندنه‌‌وه‌ی شه‌ڕیان لێ ده‌كه‌ن.

سه‌رچاوه‌كان:
ماڵپه‌ڕی نیشتمان
رۆژنامه‌ی (پیام كردستان) ژماره 33