پێشكه‌شه‌به‌قوربانییه‌كانی ٧ی پووشپه‌ڕ

ژیان گه‌ڕانه‌و گه‌ڕانیش ژیان، به‌ڵام تۆ بڵێی هاوار، شه‌ڕ، وێرانی و كۆچ چی بن؟ ئه‌وانه‌ی كه‌له‌منداڵدانی دایكیانه‌وه‌و له‌سه‌ره‌تای ژیانه‌وه‌گوێیان به‌ده‌نگی ماڵوێرانكه‌ری شه‌ڕ ئاشنایه‌، پاش له‌دایكبوونیان چاو و بیریان وردتر له‌و كاره‌ساتانه‌ده‌ڕوانن، كه‌له‌ده‌وروبه‌ریان رووده‌ده‌ن. مردنی به‌كۆمه‌ڵ و قڕكردنی كۆمه‌ڵه‌خه‌ڵكێك له‌نهێنیه‌كانی ژیان و چیرۆكه‌هه‌رده‌م سه‌وزه‌كانی مرۆڤایه‌تین. مرۆڤه‌كان زۆرجار له‌به‌رگی مرۆڤدا‌ده‌بنه‌ئه‌و گورگانه‌ی، كه‌بۆ رژاندنی خوێنی مرۆڤه‌كانی دیكه‌له‌پشت چیاو و لوتكه‌ی ژیان و ئاوه‌دانیه‌وه‌ لوره‌یان دێ. ئه‌وان تینوی خوێن و ده‌سه‌ڵاتن و بۆ گه‌یشتن به‌ئامانجه‌گڵاوه‌كانیان پێویستیان به‌قوربانی و سووته‌مه‌نی هه‌یه‌. لوره‌ی مرۆڤه‌گورگه‌كان بۆ وێرانیی و ئاگرنانه‌وه‌یه‌و به‌هه‌رزمان و ده‌نگێك بدوێن، ئاوازیان ته‌نیا مانای كوشتن و قه‌ڵاچوكردن ده‌دا.

تۆپی زه‌وی سووڕده‌خوا و هه‌رجاره‌ی ره‌وه‌گورگێكی دڕنده‌ به‌ناوی جیاواز و له‌ژێر دروشمی ره‌نگاوڕه‌نگدا بۆ قه‌ڵاچۆكردنی مرۆڤه‌كان پلان داده‌ڕێژێ. له‌كه‌رتی ره‌شی ئه‌فریقاوه‌هه‌تا ده‌گاته‌ئه‌مریكای لاتینی ژێر چه‌كمه‌ی سیاسه‌تی كۆلۆنیالیزم، له‌هیرۆشیمای ژاپۆنه‌وه‌هه‌تا ده‌گاته‌شاره‌كه‌م "سه‌رده‌شت" و ده‌سته‌خوشكه‌كه‌ی هه‌ڵه‌بجه‌، هه‌موویان خاوه‌نی سه‌دان رووداوی جه‌رگبڕ و تاسێنه‌رن. له‌و كاره‌ساتانه‌دا مردن ئه‌و ره‌مزه‌نییه‌، كه‌چاوه‌كانمان نه‌یبینی، به‌ڵكو باڵای مه‌رگ و سیمای مردن له‌سه‌ر شه‌قام و كۆڵان و ته‌نانه‌ت له‌چوارچێوه‌ی ماڵه‌كاندا پیاسه‌ده‌كا. رۆژانێك هه‌ن، كه‌مه‌ردن بۆنی دێ و گۆڕستان بانگی دیدار و كۆبوونه‌وه‌ده‌كا. ئه‌و رۆژانه‌ن، كه‌مردن ده‌بێته‌ته‌خته‌ڕه‌شه‌ی قوتابخانه‌ی ژیان و مرۆڤیش ده‌بێته‌ئه‌لفوبێی نووسین. مێژووی مرۆڤایه‌تی پڕن له‌و كاره‌ساتانه‌ی، كه‌ئاسمان له‌هه‌ژه‌مه‌تی ژان و ئازاریان خۆی هه‌ڵده‌پازنێ و له‌ئاسۆی بوونیدا ئاخی هه‌تا سه‌ری هه‌ڵده‌كێشێ‌.

ئێواره‌یه‌و هێدی هێدی خه‌ریكه‌سێبه‌ر شۆڕده‌بنه‌وه‌. كرێكاران له‌سه‌ر چاخواردنی عه‌سرانه‌هه‌ستاونه‌وه‌و وه‌ستا هاواری كه‌ره‌سته‌ده‌كا. میوه‌فرۆشه‌كانی شار خۆیان بۆ ئێواره‌بازاڕ ئاماده‌ده‌كه‌ن و له‌شه‌قامی سه‌ره‌كی شار داشقه‌و چه‌رخی تایبه‌تیان داناوه‌.ژماره‌یه‌ك له‌و میوه‌و سه‌وزه‌فرۆشانه‌ئاوڕشێنی ده‌وروبه‌ری شوێنگه‌ی خۆیان ده‌كه‌ن و ده‌نگیان بۆ هاواری ئێواره‌بازاڕ ساف ده‌كه‌ن. ماوه‌یه‌كه‌ ده‌رگای قوتابخانه‌كان داخراون و له‌ژێر تیشكی خۆره‌تاودا منداڵانی گه‌ڕه‌كه‌كانی شار ده‌سته‌ده‌سته‌به‌ره‌و پاركی شار شۆڕ ده‌بنه‌وه‌، تاكو له‌و شوێنه‌به‌رته‌نگ و پڕ له‌هه‌رایه‌دا رۆژگاری منداڵانه‌و لاوه‌تی به‌خۆشی تێپه‌ڕ بكه‌ن. به‌شێك له‌منداڵ و مێڕمنداڵان له‌ده‌وروبه‌ری پاركی شار وێڕای به‌سه‌ربردنی كات خه‌ریكی فرۆشتن و به‌كرێدانی كه‌ل و په‌لی یاری ‌منداڵانه‌ن. مزگه‌وته‌كانی شار خه‌ڵك بۆ كۆبوونه‌وه‌له‌ده‌وری یه‌ك بانگ ده‌كه‌ن و ده‌رگایان خستۆته‌سه‌ر پشت بۆ ئه‌وه‌ی باوه‌ڕداران نوێژی عه‌سرانه‌ی خۆیان بكه‌ن. ژنانی گه‌ڕه‌كه‌كانی شار له‌به‌رده‌رگای ماڵه‌كانیان خه‌ریكی دوان و قسه‌كردن له‌گه‌ڵ جیرانه‌كانیان و چاوه‌دێری منداڵه‌كانیان ده‌كه‌ن. سه‌رچاوی شار له‌ئێواره‌دا شوێنی كۆبوونه‌وه‌ی به‌شێك له‌پیاوانه‌و خوڕه‌ی ئاوی سه‌رچاوه‌سرنجی رێبواران بۆ لای خۆی راده‌كێشێ، كه‌به‌دوو جۆگه‌ی ته‌نیشت شه‌قامی سه‌ره‌كی شاردا ده‌كشێن. له‌كاڕێژی شار ده‌نگی چه‌ند خاوه‌ن ماشێنێك دێ، كه‌به‌ده‌نگی به‌رز هاوار ده‌كه‌ن مه‌هاباد سه‌واریی. مه‌لای نه‌ترس، مه‌لا باقی له‌سه‌ر شه‌قامی شار پیاسه‌ده‌كا و له كۆنجێكدا نوشتوو بۆ خوازیارانی دوعا و چاكبوونه‌وه‌ده‌كا، بێخه‌به‌ر له‌وه‌ی ببێته‌خۆراكی كاره‌ساتێكی شاراوه‌. حه‌مه‌، ئه‌و پیره‌پیاوه‌ی به‌به‌قه‌ناسرابوو، له‌ته‌نیشت سه‌رچاوه‌ی شار له‌گه‌ڵ چه‌ند كه‌سێك له‌خاوه‌ن دوكاندار و پیاوه‌به‌ساڵداچووه‌كاندا خه‌ریكی گه‌مه‌و شه‌ڕه‌جنێو و گوچان هاویشتنه‌. ژنی به‌ساڵداچوو، عه‌بداڵی له‌ده‌وری پاركی شار هاتوچۆ ده‌كا و له‌یادی كوڕه‌له‌ده‌ست چووه‌كه‌ی دا هاوار و گازنده‌ ده‌كا. ئه‌حمه‌د شه‌ریفی، ئه‌و پیاوه‌ی كه‌سه‌رده‌مێك له‌دوڵتانچك كاری جۆڵایی ده‌كرد، ئێستا له‌كۆڵان و شه‌قامه‌كانی شاردا ده‌گه‌ڕێ و به‌ده‌نگی به‌رز هاوار ده‌كا، زه‌لام، زه‌لام ئه‌وه‌تا زه‌لام.... له‌به‌رده‌م پادگانی شار و له‌راسته‌ی شه‌قامی شار مینه‌بێتوشی به‌بڵیندگۆی ده‌ستی هاوار ده‌كا و په‌یامه‌كانی به‌ناو فه‌رمانداریی بڵاوده‌كاته‌وه‌. له‌شه‌قامی میوه‌فرۆشان محه‌ممه‌ی عه‌باسی به‌ده‌نگی به‌رز هاوارده‌كا و په‌یامی هه‌راجكردنی فه‌ڕش و به‌ڕه‌به‌گوێی بیسه‌ران و رێبواران ده‌گه‌یه‌نێ.

له‌ژێر ده‌واری ئاسمانی ساماڵ و تۆزگرتوودا، ئه‌و ئێواره‌یه‌دڵم ته‌نگه‌و له‌په‌نای ئاره‌قه‌هه‌ڵڕشتندا په‌نجه‌ی خه‌یاڵم له‌ده‌رگای كۆشكی بیروه‌ریه‌كانم ده‌دا. كۆشكی بیره‌وه‌ریه‌كانی مێرمنداڵێك پڕه‌له‌ژان و ئازاری ژیان. له‌١٤ سه‌رماه‌زی ١٣٥٦ دا هاتنی تانكه‌كانی ئه‌ڕته‌شی شاهه‌نشاهی بۆ سه‌ر شه‌قامه‌كانی شارم دێته‌وه‌بیر، كه‌كوێرانه‌كه‌وتبوونه‌ویزه‌ی خه‌ڵك. ئێواره‌ی ١٤ سه‌رماوه‌ز پڕ بوو له‌بۆنی باڕوت و دوكه‌ڵ و په‌یامی خه‌م و كۆست، به‌ڵام له‌پێناوی رووخاندنی نیزامی پاشایه‌تیدا بوو. ته‌سلیمبوونی ئه‌رته‌شی شاهه‌نشاهی له‌سه‌رده‌شت و قۆناخی سه‌ركه‌وتنی شۆڕش و بۆمباران و تۆپباران كرانی شار له‌لایه‌ن هێزه‌كانی ئێران و عێڕاق و كۆچی به‌كۆمه‌ڵی دانیشتوانی شارم بۆ چه‌ند جار به‌خێرایی هاته‌وه‌به‌ر چاو. منداڵێك، كه‌كه‌لوپه‌لی یاریه‌كانی بریتی بن، له‌ فیشه‌ك و نارنجۆك و گولله‌خۆمپاره‌و مینه‌كانی دژی نه‌فه‌ر و جۆری تفه‌نگه‌كان بێ، مه‌گه‌ر ده‌كرێ كۆشك و ته‌لاری بیره‌وه‌رییه‌كانیی به‌دوور بێ له‌وێرانی و شه‌ڕ؟

له جه‌رگه‌ی ئه‌و جوڵه‌و خه‌یاڵانه‌دا بوو، كه‌فڕۆكه‌شه‌ڕكه‌ره‌كانی عێڕاقی بۆ لێدانی بۆمبه‌كانیان خۆیان شۆڕكرده‌وه‌و نێوه‌ڕاستی شاریان پێكا. چاوه‌ڕوانی به‌رده‌وامبوونی بۆمباران بووین، به‌ڵام ته‌قینه‌وه‌ی بۆمبه‌كان له‌گه‌ڵ ئه‌وانی رابردوو جیاوازیان زۆر بوو. ده‌نگی ئه‌و بۆمبانه‌كپتر بوو و دوكه‌ڵێكی سپی و زه‌ردره‌نگ به‌ره‌وه‌به‌رزای روومه‌تی شار به‌رزبۆوه‌. هێشتا چه‌ند خوله‌كێك تێنه‌په‌ڕیبوو، كه‌به‌هاوكارێكم گوت ئه‌و بۆمبارانه‌شیمیاییه‌و بۆنی دێ. له‌ساڵانی رابردوودا زۆرجار له‌ده‌یان میتری شوێنی بۆمب و ناپاڵمه‌كان بووین، به‌ڵام هه‌رگیز بۆنێكی له‌وجۆره‌مان به‌رلوت نه‌كه‌وتبوو. جوڵه‌ی شار وه‌ستا و بێده‌نگی و هاوار تێكه‌ڵ به‌یه‌كبوون. له‌گه‌ڵ ئه‌وه‌ی هه‌ستم ده‌كرد، كه‌گازی خه‌رده‌ل ره‌نگێكی مه‌یل و زه‌ردی هه‌یه‌، به‌ڵام بۆ دڵنیابوون له‌ئازاره‌كانی ئه‌و رووداوه‌له‌شوێنی كاره‌وه‌به‌ره‌و شه‌قامی سه‌ره‌كی شار و گه‌ڕه‌كی سه‌رچاوه‌وه‌ڕێكه‌وتم. تا نیزیكتر ده‌بوومه‌وه‌هاواری ماڵوێرانی به‌رزتر ده‌بۆوه‌و خه‌ڵكێكی زۆر پاش ئاگاداربوون له‌بۆمبارانی شیمایی رێچكه‌و رێگای ده‌ره‌وه‌ی شاریان ده‌گرته‌به‌ر. له‌سه‌ر یه‌ك زانیاری له‌سه‌ر چۆنیه‌تی به‌رگریكردن به‌رامبه‌ر به‌چه‌كی شیمایی كه‌م بوو، بۆیه‌هێندێك كه‌س له‌پاش لێدرانی شار و وێرانبوونی ماڵه‌كانیان هه‌وڵیان ده‌دا به‌كۆڵ بارگه‌و بنه‌ی خۆیان بگوازنه‌وه‌. كاره‌ساته‌كه‌له‌وه‌گه‌وره‌تر بوو، كه‌مرۆڤ ئه‌و كات به‌چاوی خۆی ده‌یدی. وه‌ك مێرمنداڵێكی عه‌وداڵ به‌دوای رووداوه‌كاندا سه‌ردانی شوێنی بۆمبه‌كانم كرد، به‌ڵام خه‌ڵكێكی كه‌م و به‌دگمه‌ن له‌شه‌قامه‌كانی شار ده‌بینران. له‌گه‌ڕه‌كی سه‌رچاوه‌پیره‌پیاوێك و پیرێژنێكم بینین، كه‌خه‌ریكی راگواستنی نوێنه‌كانیان بوون، كه‌له‌جاجمه‌یه‌كی ره‌نگاوره‌نگدا پێچرابوون. هاوارم كرد، بێجگه‌لێره‌له‌كوێی دیكه‌ی داوه‌. پیره‌پیاوه‌كه‌هه‌ڵوێسته‌یه‌كی كرد و گوتی لای فه‌رمانداری. رێگه‌ی خۆمم گرت و به‌ره‌و لای فه‌رمانداری چووم، كاتێك چاوم به‌شوێنی بۆمبه‌كان ده‌كه‌وت، به‌رواڵه‌ت وێرانیه‌كی زۆریان به‌دیاری نه‌هێنابوو. له‌نیزیك فه‌رمانداری حه‌شیمه‌تێكی زۆری لێبوو، كه‌لێیان نیزیك بوومه‌وه‌سه‌دان برینداری چه‌كی شیمایی بوون كه‌له‌به‌ر نه‌بوونی جێگا و رێگا له‌هه‌وای ئازاد و له‌ساڵۆنی تایبه‌ت به‌وه‌رزشی شار خه‌وێندرابوون. نیشانه‌سه‌ره‌تاییه‌كانی ئه‌و رووداوه‌زۆر ترسێنه‌ر نه‌بوون، به‌ڵام هێدی هێدی گازی خه‌رده‌ل كاری خۆی ده‌كرد و رێژه‌ی قوربانییه‌كان زیاتر ده‌بوون.

پاش سووڕخواردنێك زۆر له‌ده‌وری برینداره‌كان و رامان له‌ژیان رێگای ماڵه‌وه‌م گرته‌به‌ر. شه‌قامه‌كان چوڵ بوون و ته‌نیا جریه‌وه‌ی كوێلكه‌و هێندی باڵندی دیكه‌و جار و بار ده‌نگی ماشێنێك رایانده‌چڵه‌كاندم. بۆنی گازی خه‌رده‌ل هه‌ر به‌رده‌وام بوو، به‌ڵام له‌كاتی لێدانی بۆمبه‌كاندا گژه‌بایه‌كی توندی هه‌ڵیكرد، كه‌بوو به‌هۆی بڵاوكردن و دوور خستنی خێرای گازه‌كه‌له‌ سه‌ر ئاسمانی شار. به‌ته‌نیشت گۆڕستانی شاردا تێپه‌ڕیم و ورده‌ورده‌له‌ماڵه‌وه‌نزیك بوومه‌وه‌. گه‌وره‌ساڵه‌كان تاسابوون و منداڵه‌كان هێشتا له‌خه‌می گه‌و‌ره‌كان تێنده‌گه‌یشتن. له‌گه‌ڵ ئه‌وه‌ی مردن بۆی هه‌بوو میوانی هه‌ر ماڵێك بێ، به‌ڵام ژیان له‌ته‌واوییه‌تی خۆیدا ئاوێته‌ی مه‌ردن ببوو. منیش سه‌ره‌ڕای مه‌ترسیداربوونی دیدار و دیتنی شوێنی بۆمبه‌كان، هێشتا له‌خه‌می ئه‌وه‌دا بووم كه‌ به‌یانی جارێكی دیكه‌ سه‌ردانی ئه‌و شوێنانه‌بكه‌مه‌وه‌. ئه‌وه‌سوننه‌تی ژیانه‌، كه‌مرۆڤ له‌و ته‌مه‌نه‌دا كه‌متر ده‌چێته‌قوڵایی مانای مه‌رگ و ژیان و مه‌ترسییه‌كان وه‌ك هه‌ن تێناگات. گه‌ڕه‌ك و به‌گشتی شار له‌باوه‌شی گرده‌سووردا له‌سووكه‌خه‌وی سه‌فه‌ر به‌ره‌و گۆڕستاندا بوون. تاریكی باڵی كێشا به‌سه‌ر ئه‌و مه‌ڵبه‌نده‌ی، كه‌چه‌ند كاتێك پێشتر له‌لایه‌ن نوێنه‌رانی ئه‌هریمه‌نه‌وه‌كه‌وته‌به‌ر هێرش و په‌لاماری گازی خه‌رده‌ڵ و به‌چه‌كی قه‌ده‌غه‌كراو پێكرا.

له‌تاریكی شه‌ودا هاواری زامه‌كان زیاتر ده‌بیستران و گه‌وره‌یی كاره‌ساته‌كه‌ تا راده‌یه‌كی بۆ خه‌ڵك روون ببۆوه‌. ئه‌ستێره‌كانی له‌سه‌ر ته‌خته‌ی سینگی ئاسمان ده‌دره‌وشانه‌وه‌، كه‌به‌رێژه‌ی تروسكانه‌وه‌ی ئه‌و ئه‌ستێرانه‌پرسیاری بێوه‌ڵام له‌ئارادابوون. له‌و شه‌وه‌دا كێ بوو وڵامی ئه‌و پرسیارانه‌بداته‌وه‌، كه‌ببێته‌مایه‌ی ئارامكردنه‌وه‌ی دڵی ئه‌و بنه‌ماڵانه‌ی كه‌زۆربه‌ی ئه‌ندامانیان له‌ده‌ستدابوو. كام هێزو ئیراده‌له‌وساته‌وه‌خته‌دا، بۆ زامی هه‌زاران زامدار خاوه‌نی چاره‌سه‌ره‌. هه‌ڵپڕوكانی گوڵی ژیانی سه‌دان كه‌س و ژاكانی گوڵی هیوای سه‌دان بنه‌ماڵه‌كۆستێكی هێنده‌كه‌م و سانا نییه‌، كه‌مرۆڤ و ته‌نانه‌ت مه‌ڵبه‌ندێك به‌ئاسانی پشتگوێی بخات. هه‌ڵپڕوزاندنی مرۆفه‌بێتاوانه‌كان و به‌تایبه‌ت ژن و منداڵ و به‌ساڵداچووه‌كانی نه‌ته‌وه‌یه‌ك، له‌به‌رده‌م مرۆڤایه‌تی به‌دروشم خاوه‌ن هه‌ڵوێستدا، زه‌برێكی به‌ژانه‌، كه زۆر جار ‌نیشتمان و نه‌ته‌وه‌یه‌ك ده‌هه‌ژێنێ.

كزه‌بایه‌كی نه‌رمی هاوین‌ دڵه‌ماندوه‌كه‌ی شار باوه‌شێن ده‌كا. دارستانی گۆڕستان به‌ده‌م كزه‌بای هاویندا‌، پرچی رنراوی شۆڕده‌كاته‌وه‌. لقی داره‌كان له‌خه‌می قوربانییه‌كانی ئه‌مجاره‌دا له‌سه‌ر پشت وه‌ستاون و له‌گه‌ڵ نه‌رمه‌بای شه‌و خۆیان راده‌ژێنن. روحی خه‌وتووی كۆچكردوه‌كان له‌گۆڕستاندا شڵه‌ژاون و بۆ زگ سووتانی شار به‌په‌رۆشن. شینی به‌كۆمه‌ڵ زۆر ماڵی هه‌ژاندووه‌و بانگی مزگه‌وته‌كان له‌سه‌ر یه‌ك ده‌رمانی ده‌رده‌دارانی ئه‌و شه‌وه‌نییه‌. له‌جه‌رگه‌ی شه‌ودا هاوار و بانگه‌وازی تایبه‌ت بڵاوده‌بێته‌وه‌، كه‌هانی دانیشتوانیی شار ده‌دا، كه‌بۆ كه‌مكردنه‌وه‌ی شوێنه‌واری گازی شیمایی پێویسته‌جل و به‌رگ و له‌شیان بشۆن. شارو ژیانی دانیشتوه‌كانیی له‌ته‌نگه‌به‌ری شه‌وه‌پڕ له‌ژانه‌كه‌دا به‌ره‌وه‌ئامێزی به‌یانیه‌كی پڕ له‌فرمێسك و رۆژێكی خه‌ماوی ده‌ڕون. له‌یه‌كه‌م چركه‌ساته‌كانی به‌یانییدا هه‌واڵی زۆربوونی رێژه‌ی شه‌هیده‌كان رومه‌تی گه‌وره‌ساڵانی پڕ له‌چین و رق ده‌كرد. له‌مردووشۆره‌كه‌ی لای مزگه‌وتی سه‌رچاوه‌ی شار هه‌تا گۆڕستانی داوێنی گرده‌سوور رێگا و شه‌قام له‌به‌رده‌م قوربانیه‌كاندا بێده‌نگ راكشاون. ته‌رمه‌كان زۆرن و به‌شدارانی به‌خاكسپاردنی شه‌هیده‌كان شه‌كت و دڵشكاو. ده‌فه‌ژه‌نه‌كانی شار هاوڕێیه‌تی شه‌هیده‌كان ده‌كه‌ن و هه‌تا سه‌ر گۆڕستان به‌ قامكی ده‌سته‌كانیان ده‌نگ و سۆزی بێتاوانه‌كان به‌گوێی سروشت ده‌گه‌یه‌نن.

شاری بسكی سه‌وزی ئاڵۆسكاوه‌و روومه‌تی زه‌رد هه‌ڵگه‌ڕاوه‌. سه‌رچاوه‌ی شار پڕ به‌گه‌رووی هاواری خنكانی شار ده‌كا و له‌ژانی ئه‌و كاره‌ساته‌سه‌ری خۆی هه‌ڵگرتووه‌و به‌قه‌دی شاردا تێپه‌ڕ ده‌بێ، بۆ ئه‌وه‌ی هه‌واڵی ئه‌و كۆچه‌به‌كۆمه‌ڵه‌به‌دۆڵ و چیاو و كه‌ڵوێی سنوور شكێن بگه‌یه‌نێ. كۆچی ناچاری و كورتماوه‌هانی دانیشتوانی شار ده‌دا، كه‌بۆ هه‌ستانه‌وه‌ی سه‌ر له‌نوێ و كۆكردنه‌وه‌ی تواناكان ده‌سته‌وداوێنی گوند و ناوچه‌كانی ده‌وره‌به‌ری سه‌رده‌شت بن. ته‌پوتۆزی زه‌ردهه‌ڵگه‌ڕاوی سه‌ر شه‌قام و بانه‌كانی شار ژه‌هراویه‌و بۆنی مه‌رگی لێدێ. مه‌رگ ئیدی ئه‌و نهێنییه‌شاراوه‌نییه‌، كه‌جار و بار سه‌ر به‌باوه‌شی بنه‌ماڵه‌یه‌كدا ده‌كا، به‌ڵكو له‌روناكی رۆژ و تاریكی شه‌ودا و له‌كۆڵان و شه‌قامی شاردا ئاماده‌یه‌. سام و ترسی مه‌رگی شاراوه‌ژیان ده‌خاته‌له‌رزین و قه‌ڵافه‌تی مرۆڤ ده‌خاته‌ژێر پاڵه‌په‌ستۆی دڵه‌ڕاوكه‌و ترسی گه‌وره‌. له‌پانتایی شاردا ده‌گه‌ڕێم و پرسیاری بۆچی و له‌پێناوی چێدا، له‌سه‌ر لێوه‌كانم له‌دایك ده‌بن و به‌هێواشی له‌تارمایی بیره‌وه‌ریه‌كانمدا ون ده‌بن. هه‌واڵی كاره‌ساته‌كه‌ش له‌بێده‌نگی سه‌رده‌مدا كپ ده‌كرێ و له‌راگه‌یه‌نه‌گشتییه‌كانی ناوچه‌دا گرینگی پێنادرێ. چاره‌نووسی كورد وایه‌، كه‌به‌بێده‌نگی له‌ژێر پاڵه‌په‌ستۆی مێژووی گورگه‌كانی سه‌رده‌مدا گیانی لێ بستێندرێ و سروشت و ژینگه‌كه‌شی لێ بسوتێندرێ.

له‌كاتێكدا سه‌رده‌شت خه‌ریكی وه‌سه‌رپێكه‌وتنه‌وه‌بوو و هێشتا له‌ژێر باری گران و قورسی گازی خنكێنه‌ر پشتی راست نه‌كردبۆوه‌، له‌به‌رزاییه‌كانی دووپه‌زه‌ڕا به‌كاتیۆشا ئاورباران كرا. شه‌ڕ له‌ساڵه‌كانی كۆتایی خۆیدا بوو، هه‌ر بۆیه‌شه‌ڕی شاره‌كان و لێدان له‌خه‌ڵكی بێدیفاع زۆر په‌ره‌ی گرتبوو. سه‌رده‌شت له‌و شه‌ڕه‌دا پشكی شێری به‌ركه‌وتبوو و به‌رده‌وام له‌ژێر رهێڵه‌دا بوو. گورگه‌كان بۆ تێرخوێنكردنی هه‌ست و ویستی دڕندانه‌یان په‌نایان بۆ هه‌موو چه‌كێك ده‌برد و كوشتنی خه‌ڵكی سیفیلیان وه‌ك تاكتیكی پاڵه‌په‌ستۆخستنه‌سه‌ر یه‌ك ده‌كار ده‌هێنا. له‌نیشتمانێكدا كه‌مرۆڤ خۆی ئاواره‌یه‌ پاراستنی گیانی مرۆڤه‌كان نرخی نییه‌. هه‌ربۆیه‌له‌قۆناخی سه‌ره‌تادا بۆ برینداره‌كانی ئه‌و كاره‌ساته‌و ته‌نانه‌ت قوربانییه‌كانی دیكه‌خزمه‌تێكی ده‌رمانی و راگواستن پێشكه‌ش نه‌كرا، كه‌شیاوی ئه‌و خه‌ڵكه‌زوڵملێكراوه‌بێ. كاروانی شه‌هیده‌كانی ٧ی پووشپه‌ڕ هێشتا به‌رێگاوه‌، چوونكه‌شوێنه‌واری ئه‌و چه‌كه‌ده‌كار هاتوه‌هێشتا گیانی مرۆڤه‌كان ده‌ستێنێ.

سه‌رده‌شت‌،‌قوربانیه‌كی زیندووی چه‌كی كۆمه‌ڵكوژه‌، كه‌له‌كوردستان و ناوچه‌و جیهاندا هێشتا وه‌ك پێویست باسی نه‌كراوه‌. هیوادارم له‌پێناوی قه‌ره‌بووكردنه‌وه‌ی زیان و ئازاره‌كانی ئه‌و كاره‌ساته‌ كاری جیددی بكرێ. بۆ ئه‌وه‌ی نه‌وه‌كانی داهاتوو له‌گه‌ڵ رابردوو نامۆ نه‌بن، جێگای خۆیه‌تی ئه‌و كاره‌ساته‌ئه‌وه‌نده‌ی ده‌لوێ به‌دۆكومێنت بكرێ.

• ئه‌م بابه‌ته‌ ده‌ستکاری کراوه‌ و ئه‌و به‌شانه‌ی که‌ له‌گه‌ڵ سایتی سه‌رچاوه‌دا نه‌گونجاوه‌ بڵاو نه‌کراوه‌ته‌وه