هه‌موومان ئاگادارین 23ساڵ پێش ئێستا , له‌ به‌رواری 28-6-1987 فڕۆكه‌ مه‌رگهێنه‌ره‌كانی به‌عس , كاتژمێری 4,30 سه‌ر له‌ ئێواره‌ ژه‌هری قینی خۆیان به‌سه‌ر خه‌ڵكی شه‌هید په‌روه‌ر و كورد په‌روه‌ری شاری سه‌رده‌شتی قاره‌مان و گوندی ڕه‌شه‌ هه‌رمێ و ده‌وروبه‌ریدا باراند , 4 فڕۆكه‌ی مه‌رگهێنه‌ر , به‌م تاوانه‌یان , زياتر له هه شت هه‌زار هاووڵاتی سڤیلی ئه‌م ده‌ڤه‌ر و شاره‌یان شه‌هید و برینداركرد , چه‌ندین خێزانیان له‌ بنه‌چه‌وه‌ پاككرده‌وه‌ , تاكو ئێستا زیاتر له‌ 1000 هاووڵاتی بونه‌ته‌ قوربانی ئه‌و تاوانه‌ نامرۆڤانه‌یه‌ .

له‌ كاتێكدا ئێمه‌ یادی 23 ساڵه‌ی ئه‌و تاوانه‌ ده‌كه‌ینه‌وه‌ , هێشتا مه‌رگه‌ساتی سه‌رده‌شت نه‌بۆته‌ دۆزێك بۆ تاوانبارانی به‌غدا , هێشتا برینداره‌كانی ئه‌م شاره‌ له‌ ئێش و ئازاردا ده‌ژێن و چاره‌سه‌ری پێویستیان بۆ نه‌كراوه‌ , هێشتا ونبوه‌كان نه‌دۆزراونه‌ته‌وه‌ , هێشتا له‌ لایه‌ن ڕه‌وه‌ندی كوردی و لایه‌نه‌ سیاسییه‌كان به‌ تایبه‌ت له‌ خۆرهه‌ڵاتی كوردستان و ده‌زگاكانی ڕاگه‌یاندنه‌وه‌ گرنگی به‌م مه‌رگه‌ساته‌ گه‌وره‌یه‌ نادرێت , هێشتا سه‌رده‌شتییه‌كان به‌ ته‌نها یادی قوربانییه‌كانیان ده‌كه‌نه‌وه‌ و له‌ شیندا هاوڕێیان بێكه‌س و هاوڕێن .

ئێمه‌ له‌ چاودێری كوردۆساید كه‌ یه‌كه‌م ده‌زگای كوردی بووینه‌ گرنگیمان به‌م یاداوه‌رییه‌ داوه‌و له‌ 7 ساڵی ڕابردوه‌وه‌ , ساڵانه‌ یادمان له‌ قوربانیانی سه‌رده‌شت كردۆته‌وه‌ , له‌ یادی 23 ساڵه‌ی ئه‌م تاوانه‌دا , داوا له‌ هه‌موو لایه‌ك ده‌كه‌ین , ئه‌مساڵ یادێك له‌وتاوانه‌ و و له‌و قوربانیانه‌مان بكرێته‌وه‌ , شایانی گه‌وره‌یی یاداوه‌ری 23 ساڵه‌ی كاره‌ساته‌كه‌ بێت , ڕۆژی یاداوه‌رییه‌كه‌ بكرێته‌ ڕۆژێك بۆ ڕسواكردنی دوژمنانی گه‌له‌كه‌مان و به‌كارهێنانی چه‌كی كۆمه‌ڵكوژی كیمیاوی و هاوپشتی له‌گه‌ڵ داواكارییه‌كانی خه‌ڵكی ئه‌م شاره‌ و پاڵه‌په‌ستۆكردن بۆ كردنه‌وه‌ی دۆسیه‌ی ئه‌و تاوانه‌ له‌ دادگای باڵای تاوانه‌كان .

تاوانی كییاباراكردنی شاری سه‌ره‌شت وه‌ك له‌دادگای تاوانباری بازرگانی مه‌رگ فرانس ڤان ئانرات دیاریكرا به‌تاوانی جه‌نگ,هه‌ردوو تاوانی نێونه‌ته‌وه‌یی جه‌نگ وتاوانی دژ به‌مرۆڤایه‌تی له‌خۆ ده‌گرێت ,سزا نه‌دنی تاوانبارانی ئه‌م تاوانه‌ نێونه‌ته‌وه‌ییه‌ تاوانێكی دیكه‌یه‌ به‌رامبه‌ر به‌خه‌ڵكی ئه‌مشاره‌ .

خۆشبختانه‌ له‌كاتێكدا به‌ره‌و یادی 23 ساڵه‌ی ئه‌م تاوانه‌ ده‌ڕۆین ,له‌كۆنگره‌ی دادگای تاوانی نێوده‌وڵه‌تی له‌شاری كه‌مبالای ئۆگه‌ندا "31-5 بۆ 10-6",به‌كار هێنانی چه‌كی كیمیاوی له‌ململانێ ناوخۆییه‌كان وه‌ك تاوانی جه‌نگ په‌سه‌ندكرا ,ئه‌مه‌ش به‌هه‌نگاۆكی مه‌زن بۆ مرۆڤایه‌تی ده‌زانین بۆ قه‌ده‌غه‌كردنی چه‌كی كیمیاوی له‌جیهاندا ,هه‌نگاوێكی مه‌زنه‌بۆ دوباره‌ نه‌بونه‌وه‌ی (هه‌ڵه‌بجه‌كان وسرده‌شته‌كان,شێخ وه‌سانانه‌كان وگ ۆپته‌په‌كان و زه‌رده‌كان,سوێیسنانه‌كان و.....هتد له‌ئاینده‌دا )) ئه‌م سه‌ركه‌وتنه‌ له‌مرڤایه‌تی پیرۆز بێت .

پارت و ڕێكخراوه‌ سیاسییه‌كانی خۆرهه‌ڵاتی كوردستان
بێده‌نگی ئێوه‌ له‌ ئاست ئه‌م دۆزه‌ گرنگه‌ و گرنگی نه‌دانتان به‌م كاره‌ساته‌ گه‌وره‌یه‌ , مایه‌ی نێگه‌رانی ئێمه‌و خه‌ڵكی شاری سه‌رده‌شت و گوندی ڕه‌شه‌ هه‌رمێ و ته‌واو قوربانیانی كۆمه‌ڵكوژییه‌ له‌ ڕۆژهه‌ڵاتی كوردستان , بۆیه‌ داواتان لێده‌كه‌ین با هه‌موومان یه‌كگرتووانه‌ به‌ره‌و یادكردنه‌وه‌ی كاره‌ساتی قوربانیانی شاری سه‌رده‌شت, یادێكی وای ئه‌و تاوانه‌ بكه‌ینه‌وه‌ , له‌ ئاستی گه‌وره‌یی تاوانه‌كه‌ و ژماره‌ی قوربانیانی و تێكۆشه‌ری و مێژووی پڕ له‌ شانازی شاری سه‌رده‌شتدا بێت .