به‌ڵام دوای ئه‌وه‌ی که‌ چه‌ند ساڵێک تێپه‌ڕی و برینه‌کانی ناوه‌وه ‌سه‌ریان هه‌ڵدا و ده‌رد و ئازار به‌رۆکی پێ گرتن و شه‌ونخونی و کۆخه ‌و ئازار و ناسۆره‌کان ئه‌وکی گرتن،سکاڵایان به‌رز بۆوه‌ بۆ لای ئیداره‌ی که‌مئه‌ندامان(بنیاد جانبازان)ی شاری سه‌رده‌شت تابه‌ده‌ردیانه‌وه‌ بێت و ساڕێژی برینه‌کانیان بکات،گله‌ و ناڕه‌زایی ده‌ربڕینی ئه‌و لێقه‌وماوانه گه‌یشته‌ رێکخراوی پاراستنی مافی که‌مئه‌ندامانی شیمیایی سه‌رده‌شت و هه‌روا چه‌ند ساڵێکی خایاند تا ئه‌و رێکخراوه‌یه‌ بوو به‌ هۆی ئه‌وه، که‌ کۆمسیۆنی پزشکی بۆ دیتن و چاولێکردنی برینداره‌کان و په‌سه‌ند کردنی که‌مئه‌ندامه‌تیان‌،‌له‌ شاری سه‌رده‌شت پێک هات و زیاتر له‌ هه‌زار که‌سیان په‌سه‌ند کرد که‌ زۆربه‌یان له‌و که‌سانه‌ بوون که‌ له‌ رۆژی 7ی پووشپه‌ڕدا به‌ گازی شیمیایی بریندار ببوون و وه‌ک که‌مئه‌ندام ناسران و له‌ ئیداره‌ی که‌مئه‌ندامان(بنیاد جانبازان)دا فایلیان بۆ کراوه‌،به‌ڵام له‌ راستیدا ئه‌وانه‌ هه‌موو ئه‌وکه‌سانه‌ نین که‌ بوونه‌ قوربانی گازی شیمیایی،به‌ڵکوو زۆر زیاتر له‌وه‌ن که‌ تا ئێستا ناسراون،ئه‌وه‌ش به‌هۆی ئه‌وه‌یه‌ که‌ هیچ کارێک بۆ ناساندن و دیتنه‌وه‌یان نه‌کراوه‌ و یا له‌کاتی کۆمسیۆنی پزشکیدا به‌ هۆی جۆراوجۆر ده‌رد و ئازاره‌کانیان وه‌به‌ر چاوی دکتۆره‌کان نه‌که‌وتووه‌ ،بۆیه‌ وه‌ک که‌مئه‌ندام په‌سه‌ند نه‌کراون!!!!

به‌دوای یه‌که‌مین ده‌وری کۆمسیۆنی پزشکی له‌ سه‌رده‌شت خه‌ڵکانێکی زۆر روویان کرده‌ ئیداره‌ی جانبازان بۆ ناونووس کردنی خۆیان تا ئه‌وانیش له‌ لایه‌ن دکتۆره‌کانه‌وه‌ چاویان لێ بکرێت و ببنه‌ جانباز. ئه‌و شێوه‌ ناونووس کردنه‌ هه‌روا درێژه‌ی هه‌بوو و تا ئه‌وڕۆش هه‌روا درێژه‌ی هه‌یه‌،ئه‌وه‌ش له‌ حاڵێکدایه‌ که‌ ئێستا وه‌ڵامی کۆمسیۆنی پزشکی ده‌وره‌کانی رابردووی ساڵانی 82 تا 85 نه‌هاتۆته‌وه‌ و که‌س نازانێ له‌ لایه‌ن دکتۆره‌کانه‌وه‌ چ جوابێکیان پێ دراوه‌ته‌وه‌،وه‌ک ده‌ڵێن تا ئێستا زیاتر له‌ 15000 که‌س ناونووسیان کردووه‌ بۆ ئه‌وه‌ی ببنه‌ جانبازی شیمیایی،هه‌ر چه‌ند له‌ نێو ئه‌وانه‌شدا زۆرن که‌ ته‌نیا وه‌ک تاقی کردنه‌وه‌ ناویان نووسیوه‌ و له‌ راستیدا هیچ شوێنه‌وارێکی بریندار بوونیان تێدا نابیندرێ و بگره‌ له‌و کاته‌دا له‌ شاری سه‌رده‌شتیش نه‌بوون و وه‌ک بۆخۆیان ده‌ڵێن (ئێمه‌ش ده‌چین یا ده‌یگرێ یا نا خۆ هیچمان له‌ ده‌ست نه‌داوه‌).

به‌ڵام لێره‌دا که‌س نی‌یه بپرسێ ئه‌رێ له‌ رۆژی 7ی پووشپه‌ڕدا که‌ شاری سه‌رده‌شت به‌ هۆی بۆمباران و تۆپ بارانی دژمنه‌وه‌ وه‌ک شارێکی نیوه‌ ئاوه‌دانی لێ هاتبوو و یا ئه‌وه‌ی که‌ چه‌ند شوێنێکی تایبه‌ت بۆمبی شیمیاییان لێدرابوو ئه‌و حه‌شیمه‌ته‌ زۆره‌ له‌کوێ بوون؟ بۆ دوای 18ساڵ ئیوه‌ له‌سه‌ر یه‌ک وه‌بیر ده‌رده‌کانتان که‌وتنه‌وه‌ و ئه‌وڕۆ وه‌خۆ که‌وتوون؟ ئه‌رێ 15000 که‌س راسته‌ و برینداری 7ی پووشپه‌ڕن یا هه‌ر ئه‌وه‌یه‌ که‌(یا ده‌یگرێ یا نا خۆ هیچمان له‌ ده‌ست نه‌داوه‌)ن؟ بۆ ده‌بێ شێوه‌یه‌کی باش و باوه‌ڕپێکراو نه‌بێ که‌ به‌ڕاستی برینداره‌کان بناسێنن و‌ باش پێیان رابگه‌ن‌ و چاره‌سه‌ری ئازار و که‌م و کوڕیه‌کانیان بکه‌ن و له‌وه‌ زیاتر له‌ ره‌شایی نه‌ناسراویدا نه‌مێننه‌وه.خۆ برینداربووی گازی شیمیایی هه‌تا مردن به‌ برین و هێش و ئازاره‌کانیه‌وه‌ ده‌ناڵێ و هیچ هیوای باش بوونه‌وه‌ی بۆ نی‌یه‌ و بۆخۆشی زۆر باش ده‌زانی ته‌نیا مردن و چوونه‌ ناو گۆر ده‌رمانی هێش و ئازاره‌کانی ده‌کا،بۆ ده‌بێ ئه‌وانه‌ به‌ ئاوری حه‌شیمه‌تی زۆره‌وه‌ که‌ به‌ زۆر خۆ ده‌که‌نه‌ برینداربووی شیمیایی بسووتێن،خۆ هه‌موو ده‌زانین که‌ ئه‌و ئازیزانه‌مان شه‌و و رۆژ له‌ ناوه‌وه‌دا ده‌سووتێن و ته‌نیا دڵۆپێک ئاوی به‌ڕه‌حمه‌تیش شک نابه‌ن بۆ سارێژ کردنی بلۆق و برینه‌کانیان بۆ ده‌مێکی زۆر که‌میش.

ده‌با به‌ره‌وپیری ئه‌وانه‌وه‌ بێن که‌ به‌ڕاستی که‌مئه‌ندامی شیمیایین و به‌ راستی هه‌موو شتێکیان له‌ده‌ستداوه‌ و هیچیان نه‌ماوه‌ دڵی پێ خۆش که‌ن،ده‌با بیانناسن و کوێ بگرنه‌ سکاڵا و ده‌رده‌کانیان و هێش و ئازاره‌کانیان بڕێک که‌م که‌نه‌وه‌.