ئه‌و رۆژه‌ زۆری به‌سه‌ردا رابورد و زۆر که‌سمان نه‌مان و مردن،خۆشه‌ویستان، باب و دایک،برا و خوشک،دۆست و هه‌واڵ،جیران و نزیک، زۆر که‌سی دی هه‌بوون که‌ به‌ زۆر و ناپیاوانه لێیان ستاندین و له به‌ر چاومان کردیانن به‌ قوربانی شه‌ڕێکی به‌زۆر داسه‌پێندراو و به‌ره‌و گۆڕیان بردن.

زۆرداران زۆر جار ده‌ستدرێژیان کردوینه‌سه‌ر و بێتاوان خوێنیان رشتووین،له‌و‌ رۆژه‌وه‌ که‌ زه‌وی وزار و مڵک و ماڵیان به‌ ئاور سووتاندین یان ئه‌وه‌ی که‌ گه‌وره‌پیاو و ماقووڵ و لاوه‌کانمانیان له‌ ژورێکدا ئاوردان تا ئه‌و رۆژه‌ی که‌ زلهێزان و دڵڕه‌شان به ده‌ستی به‌کرێکیراوه‌کانیان دووباره‌ بوونه هۆی به‌ کۆمه‌ڵ کوشتنی ئێمه‌ی بێتاوان.

حه‌وتی پووشپه‌ڕی ساڵی 66 ئه‌و رۆژه‌ بوو که‌ ئێمه‌یان خسته‌ به‌ر هێرشی بۆمبی شیمیایی که‌ بوو به‌ هۆی شه‌هید بوونی سه‌دان که‌س و بریندار بوونی هه‌زاران ژن و پیاو و منداڵی شاری سه‌رده‌شت، ئه‌و شاره‌ی که بۆ یه‌که‌م جار له جیهاندا به گازی شیمیایی هێرش کرایه‌ سه‌ر خه‌ڵکی بێتاوانی و کاره‌ساتێکی وایان تێدا خوڵقاند که‌لاپه‌ڕی مێژوو بۆ هه‌میشه‌تێیدا ده‌نووسرێ و ده‌نووسرێته‌وه‌.

رۆژ به‌ رۆژ له‌ حه‌وتی پووشپه‌ڕ نزیک ده‌بینه‌وه‌ و کاره‌سا‌ته‌که‌ی ساڵانی رابردوومان دێنه‌وه‌به‌رچاو،بریندار و شه‌هید بوونی خۆمان و خۆشه‌ویستانمان بۆ تازه‌ ده‌بێته‌وه‌،رۆژێکی وه‌ها که‌ هه‌رگیز له‌ یادمان ناچێت چۆن که‌وتینه‌ به‌ر هێرشی دژمنانی گه‌ل و نیشتمانه‌که‌مان.

شاری سه‌رده‌شت له‌و رۆژه‌دا دڵته‌زێنترین و ناحه‌زترین کاره‌ساتی به‌سه‌ر هاتوه،له ‌سه‌ر شانی ئێمه‌یه‌ که‌ دڵسۆزانه‌ و به‌په‌رۆشه‌وه‌ به‌ره‌وپیری ئه‌و رۆژه‌ بچین و به‌ رێز و حورمه‌ته‌وه‌ پێشوازی لێ بکه‌ین،با هه‌ر له‌ ئێستاڕا خۆی بۆ ئاماده‌ بکه‌ین و به‌رنامه‌ی باش و جوانی بۆ داڕێژین،بۆ ئه‌وه‌ی که‌ روحی شه‌هیدانمان شاد کردبێت، با له‌و رۆژه‌دا دووکان و بازاڕه‌کان داخه‌ین و ئاڵای ره‌ش له‌سه‌ر دووکانه‌کانمان هه‌ڵواسین،باهه‌موو پێکه‌وه له‌و رۆژه‌دا به‌ره‌و گۆڕستانی شه‌هیدان وه‌ڕێ که‌وین و‌ له‌ سه‌ر گڵکۆی شه‌هیدانمان یه‌ک ده‌نگ هاوار که‌ین (ئه‌ی شه‌هیدان! ئه‌ی شه‌هیدان! ئێوه‌ قه‌ت ناچن له‌ بیرمان).