ئێمه وەك كوردێكی نیشتەجێ له وڵاتی ئێراندا هەر له سەرەتای چوونه قوتابخانه و هەوڵدان بۆ فێربوون و زانست به زمانی فارسی دەستمان داوەته خوێندن و هەر بەو زمانەش راهاتووین و پلەكانی قوتابخانه تا دوایین قۆناغی فێربوونمان هەر بەو زمانه بووه،جا بۆیه زمانی زگماكی خۆمان بێگانەترین زمانه له نێوماندا كه بەداخەوه نازانین ناوی خۆشمان به زمانی خۆمان بنووسین و بخوێنینەوه،ئەوەش جێگەی داخه.

به خۆشیەوه چەند ساڵێكه فێرگەی زمانی كوردی سۆما دەستی داوەته هێرشێكی گەوره له دژی نەزانی و نەخوێندەواری زمانی كوردی،بۆ فێركردن و ناساندنی ئەو زمانەی كه پێی دەدوێین و نایزانین. سۆما فێرگەیەكه كه مامۆستایانی دڵسۆز و نیشتمانپەروەر پێكیان هێناوه و بەوپەڕی دڵسۆزی و لەخۆبردووییەوه بۆ فێر كردنی زمانی كوردی به رۆڵەی كورد قۆڵیان هەڵماڵیوه و ماندوویی نەناسانه شەو و رۆژ خەریكی خزمەت كردنن و له كەمترین بوون و ئیمكانات زۆرترین كەڵكی پێویست وەردەگرن،له گەڵ ئەوەش جێگەی خۆشحاڵی یه كه رۆڵەی كوردیش رۆژ به رۆژ زیاتر بەرەوپیری سۆما دەچن بۆ فێر بوونی زمانەكەیان.

فێرگەی زمانی كوردی سۆما له سەردەشت4 ساڵه دامەزراوه كه یەكەمین فێرگەی زمانی كوردی لەو شارەدابووه و زۆر باش خەریكی خزمەت كردنه كه به خۆشیەوه تائەوڕۆ توانیویەتی به شێوەیەكی باش و چاوەڕوان لێكراو ئەركی خۆی بێنێتەجێ،ئەركی فێركردن و تێگەیاندن له زمانی كوردی كه زمانی زگماكی هەموو دانیشتوانی شار و ناوچەكەمانه. سۆما له سەردەشت به سەرپەرشتی مامۆستای كارامه و دڵسۆز و زانای شارەكەمان،مامۆستا هێرش بێتووشی دامەزراوه كه سەر به فێرگەی زمانی كوردی سۆما،ناوەندی مەهاباده. بەڕێز و خۆشەویست مامۆستا هێرش كه له دریژەی تەمەنی خۆیدا هەمیشه وەك مامۆستایەك له خزمەت گەلەكەیدا بووه ئەم جارەش له بواری فێركردنی زمانی كوردی هێرش دەكاته سەر نەزانی و نەخوێندەواری كورد و بۆ فێر بوونی زمانەكەیان بە بێ چاوەڕوانی له هیچ تاكێك یان كەسایەتییەك هەوڵ دەدات. هەر چەند فێرگەكەی لەو پەڕی فەقیری و دەستكورتی دایه و هەموو قورسایی و بارگرانیەكەی له سەر شانی مامۆستای سۆمایه،تەنیا چاوەڕوانی ئەو بەڕێزه له خەڵكی شار و ناوچه ئەوەیه روو بكەنه فێرگەكانی زمانی كوردی بۆ فێربوون و زانینی زمانی كوردی كه ناسنامەی نەتەوەكەمانه.

بەو هیوایه كه زیاتر رووبكەینه فێرگەی زمانی كوردی سۆما و گشت فێرگەكان و هەموومان زۆر باش فێری خوێندن و نووسینی كوردی ببین و به شێوەیەكی باشتر و ئاكادێمی خۆمان و نەتەوەكەمان بناسین