ده‌سه‌ڵاتی بووش و سه‌رۆکایه‌تی وڵاته‌ یه‌کگرتووه‌کان له‌ عێڕاق و ئه‌فغانستاندا به‌ دوای دوو شه‌ڕی گه‌وره‌ و ماڵوێرانکه‌ر بۆ زۆربه‌ی خه‌ڵک و ئه‌م وڵاتانه‌،قازانج و به‌ ده‌سه‌ڵات گه‌یشتن و رزگاری به‌شێک له‌ نه‌ته‌وه‌کان و ئازادی خه‌ڵکانی دوو وڵاتیشی به‌ دوادا بووه له‌گه‌ڵ ئه‌وه‌ش سه‌روه‌ری نه‌ته‌وه‌یی بۆ ئه‌م دوو وڵاته‌ موسوڵمانه‌ش گه‌ڕاندۆته‌وه‌‌.

کرده‌ی "منتظر الزيدي" مه‌به‌ستی ئێمه‌ نییه‌ و باش یا خراپ قسه‌ی له‌سه‌ر کراوه‌ به‌ڵام شانۆگه‌ری عه‌ڕه‌به‌ عه‌ڕه‌بستانیه‌که‌ی 10 ملیۆن دۆلاری بۆ که‌وشه‌کان داناوه‌ بێ‌بنه‌ماترین هه‌ڵویسته‌ که‌ به‌رامبه‌ر به‌ کرده‌وه‌ی "منتظر الزيدي" به‌رچاو ده‌که‌وێ. ئه‌م عه‌ڕه‌به‌ که‌ به‌م شێوه‌یه‌ وێلخه‌رجی ده‌کات ده‌بێ له‌ خۆیدا چ بیر بکاته‌وه‌ و پێی وابووه‌(شق القمر)ی کردووه،به‌ڵام کاتێک به‌ وردی ده‌ڕوانیه‌ کاره‌که‌ی چگه‌ له‌ خۆبه‌زلزانی و دووڕوویی هیچ شتێکی زیاتر نابینی.

ئه‌گه‌ر وابێ که‌ پێڵاوه‌کانی ده‌ جۆرج بووش گیراون 10 ملیۆن دۆلار مه‌زه‌نده‌ بکرێن ده‌بێ ئه‌م پێڵاوه‌ی ده‌ مه‌لیک عه‌بدووڵڵای شای عه‌ڕه‌بستان بگیردرێ چه‌نده‌ مه‌زه‌نده‌ بکرێن؟ ئه‌دی پێڵاوێک که‌ به‌ره‌و تنتاوی بهاویژرێن چه‌نده‌یان بۆ دیاری بکرێ باشه‌؟ ئه‌گه‌ر هاتبا و کوردێک له‌ کاتی خۆیدا به‌م شێوه‌یه‌ کڵاشه‌کانی له‌ سه‌ددام گرتبایه‌ ئه‌م عه‌ڕه‌به‌ کڵاشه‌کانی به‌ چه‌ند سێنت ده‌کڕی؟ کاکی عه‌ڕه‌ب که‌ گیرفانی پڕه‌ له‌ دۆلاری ئه‌مریکی، له‌گه‌ڵ کڕێنی ئه‌م پێڵاوانه‌ وا باشتر نییه‌ به‌شێکیش له‌م دۆلارانه‌ بۆ خوشک و برا عه‌ڕه‌به‌کانی له‌ فه‌له‌ستین بنێرێت؟ یا بۆ موسوڵمانان له‌ ئه‌فغانستان تا له‌ ژێر هه‌وری نه‌داری و برسێتی رزگاریان بێت. با عه‌ڕه‌به‌کانی به‌م شێوه‌یه ده‌ستیان له‌ گیرفان دایه‌ چاوێک له‌ خۆیان و ده‌ورووبه‌ریان بکه‌ن تا ئه‌م موسوڵمانانه‌ی به‌ ده‌ست ناموسوڵمانان ده‌چه‌وسێندرێنه‌وه‌ ببینن و به‌شێک له‌ بوونیان بۆوان خه‌رج بکه‌ن.‌ ‌