هه‌ر له‌م رۆژانه‌دا بوو که‌ ده‌نگی ره‌خنه‌ی توندی شه‌جه‌ریان گه‌وره‌ هونه‌رمه‌ندی موسیقای ئێرانمان به‌ گوێ گه‌یشت که‌ چۆن به‌رانبه‌ر به‌م گرفته‌ هه‌ڵوێستی گرتووه‌ و ناڕه‌زایه‌تی ده‌ربڕیوه‌.به‌ڵام به‌داخه‌وه‌ هه‌ر وه‌ک بۆخۆی ده‌ڵێ که‌س وه‌ڵامده‌ره‌وه‌ی نییه‌!؟ با ئێمه‌ش چاوێک بخشێنین بۆ شاره‌که‌ی خۆمان سه‌رده‌شت و بزانین لێره‌ چ ده‌گوزه‌رێ و به‌رق چۆنه‌.ئێمه‌ له‌ ساڵانی رابردوودا کاتێک که‌ که‌می به‌رق له‌ ئێراندا بوونی نه‌بوو زۆر جار پچڕانی به‌رقمان هه‌بووه‌،به‌ تایبه‌ت له‌ وه‌رزی باووباراندا که‌ ئه‌ویش به‌هۆی تڵیسانه‌وه‌ی سیمه‌ کاغه‌زیه‌کانی به‌رق بوو که‌ له‌ سابڵاغه‌وه‌ به‌رقیان ده‌گه‌یانده‌ سه‌رده‌شت،یا ئه‌وه‌ی که‌ ئامێره‌ کۆن و په‌ککه‌وتووکان پێویستیان به‌ چاک کردنه‌وه‌ ده‌بوو یا به‌ قه‌ولی به‌رپرسێکی ئیداره‌ی به‌رقی شاره‌که‌مان تا تابڵۆیه‌ک له‌ شینوێ ببه‌ستن ده‌بوایه‌ به‌رقی شار بکوژێننه‌وه‌ و زۆر هۆی سه‌یر و سه‌مه‌ره‌تر له‌وه‌ به‌یه‌که‌وه‌ ده‌ستیان ده‌دایه‌ ده‌ست یه‌ک تا سه‌رده‌شت به‌رقی نه‌بێت.به‌ڵام ئه‌مساڵ به‌قه‌ولی فارس وته‌نی (قوز بالای قوز) بوو، له‌ لایه‌ک پچڕانی به‌رقی سه‌راسه‌ری و له‌ لایه‌ک باقی هۆیه‌کانی دی که‌ هه‌میشه‌ به‌روکی سه‌رده‌شتی گرتووه‌ هه‌ر چه‌ند ئێستا وه‌رزی بارینمان نه‌گه‌یوه‌تێ که‌ ئه‌و کات خرابتر له‌وه‌ چاوه‌ڕوان ده‌کرێت.ئه‌مجار شتێکی گه‌وره‌تر و خه‌ته‌رێکی چاوه‌ڕوان نه‌کراو له‌ کوژانه‌وه‌ی به‌رقی سه‌رده‌شت‌دا به‌دی ده‌کرێ ئه‌ویش رۆیشتن و هاتنه‌وه‌ی له‌ پڕی به‌رقه‌ که‌ مه‌ترسییه‌کی گه‌وره‌یه‌ بۆ گیانی هه‌موو ئه‌و که‌ره‌سانه‌ که‌ به‌ به‌رق کار ده‌که‌ن.له‌م چه‌ند رۆژانه‌ی رابردوودا بۆ چه‌ندین جار ئاوه‌ها له‌پڕ به‌رق ده‌کوژێته‌وه‌ و خیرا هه‌ڵ ده‌بێته‌وه‌،ئه‌وه‌ش به‌ دڵنیاییه‌وه‌ زۆر ئامێری به‌رقی سووتاندوه‌ و ده‌سووتێنی و ئه‌گه‌ر هه‌روا درێژه‌ی هه‌بێت مه‌ترسی ئه‌وه‌ش زیاد ده‌بێت که‌ ببێته‌ هۆی ئاگر تێبه‌ربوونی ماڵه‌کانیش.ئه‌گه‌ر ئێمه‌ وه‌ک باقی شاره‌کانی ئێران به‌ پێی به‌رنامه‌ی راگه‌یه‌ندراو ته‌نیا کووژانه‌وه‌ی به‌رقمان هه‌بێت جێگه‌ی گله‌یی نییه‌ به‌ڵام ئه‌و کێشه‌ گه‌وره‌یه‌ی له‌ سه‌رده‌شت هه‌یه‌ جێگه‌ی رخنه‌ و گله‌یی ده‌بێت.که‌ به‌ دڵنیاییه‌وه‌ ئه‌وه‌ نه‌ کێشه‌ی که‌می ئاو‌ و نه‌ کوژانه‌وه‌ی کاتی به‌رقه‌، به‌ڵکو ته‌نیا ده‌گه‌ڕێته‌وه‌ بۆ کێشه‌ی مودیرییه‌ت و لاوازی به‌سه‌ر راگه‌یشتنی به‌رقی شاره‌که‌مان که‌ به‌داخه‌وه‌ نه‌یانتوانیوه‌ چاره‌سه‌ری بکه‌ن و وه‌ک بۆخۆیان ده‌ڵێن هه‌ر نازانن له‌کوێوه‌ ئه‌م کوژانه‌وه‌یه‌‌ دێته‌ پێش به‌ڵام ته‌نیا بۆ شاری سه‌رده‌شته‌ و باقی دێهاته‌کانی.