ئه‌وه‌ی که‌ بۆ من سه‌رنجراکێش بوو کاری شاره‌وانی و شۆڕای شار نه‌بوو،چوونکه‌‌ ئه‌وه‌ ئه‌رکێکی زۆر ساده‌ و سه‌ره‌تایی خۆیانه‌ که‌ دوای چه‌ندین ساڵ ئێمه‌ لێمان دیون و جگه‌ له‌وه‌ش ئه‌گه‌ر به‌م هه‌مووه‌ بووججه‌یه‌ی که‌ بۆ سه‌رده‌شت ته‌رخان کراوه‌ ئه‌م کاره‌ش نه‌که‌ن چی ده‌که‌ن؟ ئه‌وه‌ی که‌ سه‌رنجی راکێشام چه‌ندین پارچه‌ نووسراوه‌ی چه‌ند میتری بوون که‌ بۆ ده‌ست خۆشی شاره‌داری و شۆڕای شار له‌وسه‌ر بۆوسه‌ری شه‌قامه‌کان هه‌ڵواسرابوون و هه‌ر که‌سه‌ی له‌ ژێر نووسراوه‌که‌ش ناوبانگ(شهرت)ی خۆیانیان لێ نووسیبوو تا شاره‌داری و شۆڕا بزانن کێ ده‌ستخۆشی لێ کردوون!!! منیش وه‌ک هه‌ر شارۆمه‌ندێک باوه‌ڕم به‌وه‌ هه‌یه‌ که‌ بۆ کاری چاک باره‌قه‌ڵا بڵێم، به‌ڵام باوه‌ڕیشم زیاتر به‌وه‌یه‌ که‌ له‌ نه‌کردنی کارێک و وه‌پشت گوێدانی،لانیکه‌م گله‌یی بکه‌م.ئه‌گه‌ر ئه‌م به‌ڕێزانه‌ له‌ درێژایی چه‌ندین ساڵی رابڕدوودا بۆ ته‌نیا جارێک له‌ حاست که‌م‌وکووڕیه‌کانی شاردا دڵسۆزانه‌ گله‌یه‌کیان ده‌ربڕیبا بێگومان زۆر له‌مه‌و پێش سه‌رده‌شت ئاوه‌دانتر و رازاوه‌تر ده‌بوو.

به‌ دڵنیاییه‌وه‌ به‌جێ گه‌یاندنی سه‌ره‌تایی‌ترین ئه‌رک دوای چه‌ندین ساڵ نه‌ جێگه‌ی پێهه‌ڵڵا گووتنه‌ به‌ڵکوو جێگه‌ی ره‌خنه‌شه‌ که‌ له‌ کاتی خۆیدا نه‌کراوه‌.ده‌ست‌خۆشی بۆ کاتێک ده‌بێ که‌ شاره‌وانی و شۆڕای شار زیاتر له‌وه‌ی بۆیان دیاری کراوه‌ هه‌وڵ بده‌ن و یارمه‌تی‌ وه‌رگرن و له‌ ئاوه‌دانکردن و چاکسازی شاردا خه‌رجی بکه‌ن.