ئه‌مڕۆ که‌ قسه‌ له‌ جوێ کردنه‌وه‌ی ژنان و پیاوان له‌ رۆژی زه‌ماوه‌ند و شایی‌ له‌ تالاره‌کاندا ده‌کرێ و به‌شێک له‌ مامۆستا و که‌سانی ناسیاوی شار بانگهێشت ده‌کرێن بۆ قسه‌ له‌ سه‌ر ئه‌م به‌ناو بێ‌شه‌رعییه‌ که‌ شایی و زه‌ماوه‌ند بێ!!؟ تا به‌یه‌که‌وه‌ رابگه‌یێنن ده‌بێ ژنان له‌ پیاوان جیا بکرێنه‌وه‌. باشی و خراپی ئه‌م فتوایه‌ له‌ سه‌ر شانی مامۆستا ئایینیه‌کان و ئه‌و که‌سانه‌یه‌ که‌ قسه‌یان ده‌ڕوا و ئه‌وان ده‌بێ هه‌ڵوێست بگرن،به‌ڵام خۆزگه‌ پێش هه‌ر قسه‌یه‌ک که‌سانی پێوه‌ندی‌دار به‌م کاره‌ بڕێک له‌ سه‌ر قازانج و زه‌ره‌ری ئه‌م کاره‌ بکۆڵنه‌وه‌ و له‌ دواییدا له‌ سه‌ر باشترین رای خۆیان رێک که‌ون. چوونکه‌ ئه‌گه‌ر له‌م کاره‌دا هه‌ڵه‌یه‌ک بکرێ ده‌بێ چاوه‌ڕوان بین هه‌ر ماڵه‌ی ببێته‌وه‌ تالارێک و هه‌ر ده‌شت و سه‌یرانگه‌یه‌ک وه‌ک ساڵانی رابردوو ببێته‌وه‌ مه‌یدانی شایی و زه‌ماوه‌ندی خه‌ڵکی شاره‌که‌مان. بووچوونێکی هه‌ڵه‌ و هه‌ڵوێستێکی به‌ ئیشتیا ئاکامێکی خراپێ ده‌بێ و له‌جیاتی ئاسووده‌یی و ئاسایشی خه‌ڵک هه‌را و هوریا و شه‌و به‌ ده‌نگی ته‌پڵ و تووزه‌له‌ مانه‌وه‌ی ئاکامێکی دیکه‌ی نابێ.

ئه‌گه‌ر ئه‌وانه‌ی بۆ خه‌ڵکی سه‌رده‌شت بیرده‌که‌نه‌وه‌ وشیارانه‌ و لێزانانه‌ هه‌ڵوێست نه‌گرن،هه‌ر وه‌ک به‌رنامه‌ی سه‌ره‌خۆشی و پرسه‌که‌یان به‌ره‌و شکست و هه‌ڵوه‌شانه‌وه‌ رۆیشت ئه‌م جاره‌ش له‌ ئاکامی هه‌ڵه‌یه‌کدا ئاسووده‌یی و ئارامی خه‌ڵک لێکده‌دن و به‌ داخستنی دوو تالار هه‌ر ماڵه‌ی بووک و زاوایه‌ک ده‌که‌نه‌ تالارێک.