شه‌و هێشتا ته‌واو نه‌ببوو به‌ره‌و ورمی که‌وتمه‌ رێ و چوومه‌ لای به‌رپرسی کووللی ناسنامه‌ی ئوستان له‌ ورمی. داخوازیه‌که‌ی خۆم نایه‌ پێشی و به‌ دوور راوه‌ستام. بێ ئه‌وه‌ی پیتێک له‌ داخوازیه‌که‌م بخوێنێته‌وه‌ ره‌وانه‌ی به‌شێکی دیکه‌ی کردم و له‌وێشڕا بۆ چه‌ند به‌شی دیکه‌ تا دووباره‌ هاتمه‌وه‌ی لای به‌رپرسه‌که‌ی هه‌وه‌ڵیان. وتی کاره‌که‌ت جێ‌به‌جێ بوو؟ وتم ناوه‌ڵڵا ده‌ڵێن نابێ ناوه‌که‌ی تۆ له‌ کتێبه‌که‌دا نییه‌ و کۆمیته‌ رێگه‌ی به‌ نووسینی ئه‌و ناوه‌ نه‌داوه‌ بۆیه‌ نابێ.ئه‌ویش وتی هه‌روایه‌ نابێ یا ناوێکی تر هه‌ڵبژێره‌ یا بڕۆ بۆ تاران بۆ لای کۆمیته‌ی تاران به‌ڵام زۆر دڵنیامه‌به‌ چوونکه‌ ئه‌و کتێبه‌ له‌ تاران‌ڕا هاتووه‌.پێم وت باشه‌ خۆ زۆر ئاساییه‌ که‌ ئه‌و ناوه‌ له‌م کتێبه‌دا نه‌بێ چوونکه‌ ناوه‌که‌ی من کوردییه‌ و کتێبه‌که‌ی ئێوه‌ فارسییه‌ و جگه‌ له‌ چه‌ند ناوی زۆر کۆنی کوردی شتێکی تری تێدا نییه‌.زۆرم وت و که‌میشیان وه‌رنه‌گرت، ئاخره‌که‌ی بێ ئه‌وه‌ی شتێکم کردبێت هاتمه‌وه‌ و وه‌شوێن ناوێکی کوردی دیکه‌دا گه‌ڕام تا ناوێکی کوردی جوانم دیاری کرد و چوومه‌وه‌ ئیداره‌ی (ثبت احوال)، پێش ئه‌وه‌ی پێم بڵێن کتێبه‌که‌م هه‌ڵگرت و به‌ شوێن ناوه‌که‌دا گه‌ڕام و دووباره‌ نه‌مدیته‌وه‌. کارمه‌ندی ناسنامه‌که‌ لێ پرسیم له‌ کتێبه‌که‌دا هاتووه‌ وتم ناوه‌ڵڵا،سه‌رێکی راوه‌شاند و وتی نابێ!!! پێم داگرت یا «که‌ژین» یان ناوی نانێم. که‌زانی سوورم له‌سه‌ر داخوازیه‌که‌م چه‌ند لاپه‌ڕه‌ کاغه‌زی وه‌پێش نام و وتی بزانه‌ له‌وانه‌دا هاتووه‌.منیش خێرا ده‌ستم کرد به‌ پشکنینی لاپه‌ڕه‌کان و له‌پڕ چاوم که‌ته‌ ناوه‌که‌ی خۆم به‌ڵام له‌ لای ناوه‌که‌ نووسرابوو (غیر مجاز) واته‌ رێگه‌ پێنه‌دراوه‌. به‌ سووکی له‌په‌ڕه‌که‌م لادا وه‌ک ئه‌وه‌ی که‌ هه‌ر نه‌مدیبێ. دووباره‌ له‌ لاپه‌ڕه‌کاندا گه‌ڕام تا ناوکه‌م له‌ گۆشه‌یه‌ک که‌ به‌ پێنووسی ره‌ش نووسرابوو که‌وته‌ به‌ر چاو که‌ له‌گه‌ڵ چه‌ند ناوی دیکه‌دا هاتبوو و له‌ سه‌ره‌وه‌یان نووسرابوو (مجاز). منیش خێرا ئه‌و لاپه‌ڕه‌م برده‌پێش کارمه‌نده‌که‌ و وتم ئه‌وه‌تا لێره‌دا هاتووه‌ و به‌ ره‌شی و گه‌وره‌ش نووسراوه‌ ده‌بێ. ئه‌ویش وتی دڵنیای که له‌ لاپه‌ڕه‌کانی دیکه‌دا (غیر مجاز) نه‌بووه‌ وتم به‌ڵی هه‌ر شتی وای تێدا نییه‌.

ئاخره‌که‌ی به‌ کارمه‌ند و به‌رپرسه‌وه‌ که‌ زۆریش دڵنیا نه‌بوون ناسنامه‌که‌یان بۆ نووسیم و دووای چه‌ندین رۆژ هاتووچۆ و ... ناسنامه‌ی کیژۆڵه‌که‌مان بوو به‌ که‌ژین.‌