هه‌ر ئه‌و رۆژه‌ش کاتێک به‌یانی له‌ ماڵه‌وه‌ وه‌ده‌رکه‌وتم تا گه‌یشتمه‌ به‌یانه‌بازاڕی سه‌رده‌شتێ چه‌ندین جار لاقم هه‌ڵانگووت و جارێکیان وه‌ها به‌ توندی که‌وتمه‌ نێو چاڵه‌ی پیاده‌ڕه‌وه‌که‌ خه‌ریکبوو بکه‌ومه‌ سه‌ر حه‌رزی، به‌ڵام یا ئه‌ڵڵا یا ئه‌ڵڵا و غه‌س غه‌وسی دوکاندار و ده‌ستفرۆشه‌کان به‌ڵا گێڕه‌وه‌م بوون و نه‌که‌وتم. هه‌ر چه‌ند ئێستاش ئازار و ئێشی زۆر ناهێڵی به‌ ته‌واوی پێ دابنێم.

ئه‌وه‌ هه‌ر له‌م چه‌ند رۆژه‌دا چه‌ندین جار ئاوا که‌وتوومه‌ نێو چاڵه‌وچووڵه‌ی پیاده‌ڕه‌و و کوچه‌کان. خۆ خوا ده‌زانێ هه‌موو ساڵێش عه‌وارزی خۆم ته‌واو داوه‌!!. هه‌رچه‌نده‌ خوانه‌کا که‌ له‌ فلسێکی عه‌وارزی خه‌ڵک خۆش بن و تمه‌نێکیشیان له‌ ده‌ست بێته‌ ده‌رێ. به‌ڵام خۆ نه‌ شۆڕا و نه‌ شاره‌وانی سه‌رده‌شت‌ تا ئێستا هێنده‌ ده‌ست و دڵ ئاواڵه‌ نه‌بوون که‌ یارمه‌تی ده‌ره‌کیان دابێ و نه‌هێنده‌ش بێ پوڵ و بێ یارمه‌تی بوون که‌ نه‌توانن ئه‌و کێشه‌ سه‌ره‌کیانه‌ چاره‌سه‌ر بکه‌ن.. باشه‌ که‌وایه‌ ئه‌و پوڵه‌ی لێمان وه‌ر ده‌گرن له‌ کۆێ خه‌رجی ده‌که‌ن؟!! هه‌ڵبه‌ت ئه‌وه‌ش ئه‌رکی سه‌ر شانی شاره‌وانی نییه‌ و بۆخۆمان ده‌بێ چاڵه‌کان پڕکه‌ینه‌وه‌؟!!