ئه‌م جاره‌ش کاکه‌ سه‌عیدی فه‌رهه‌نگی و شاره‌زای عولومی ته‌ربییه‌تی سکاڵای خۆی ده‌داته‌ ده‌ست پێنووسه‌که‌ی و ره‌ش و سپی هه‌رچی هه‌یه‌تی ده‌یداته‌ ده‌ر و سینگ و به‌رۆکی بێنه‌خش و نیگاری لاپه‌ڕه‌ به‌سته‌زمانه‌کانی لێ پڕده‌کاته‌وه‌.به‌ڵام به‌ قه‌ولی کورد وته‌نی پیاو قسێکیش بۆ خوای بکا،راسته‌ و ناهه‌قیش ناڵی کۆلێری گه‌رمی بینای پارلمان و ویلای تایبه‌تی دڵی ئه‌م جۆره‌ پیاوانه‌ش دێنێته‌ خۆرپه‌.

له‌ سه‌ره‌تای ئه‌م بابه‌ته‌دا،نووسه‌ر ئاماژه‌ به‌ گیر و گرفته‌کانی ئه‌م دوایانه‌ی نه‌بوونی گاز ده‌کا که زۆربه‌ی هه‌ره‌ زۆری شاره‌کانی کوردستانی گرته‌وه‌،به‌ڵام ته‌نیا تایبه‌ت به‌ ناوچه‌ کورد نشینه‌کان نه‌بوو و به‌ڵکه‌ دابه‌زینی فشاری گاز زۆر شوینی دیکه‌شی گرتبۆوه‌ بۆ وێنه‌ زه‌نجان، هه‌مه‌دان،قه‌زوین و ... که‌ من نامهه‌وێ بچمه‌ سه‌ر ئه‌و باسه‌.نووسه‌ری بابه‌ته‌که‌ به‌ راشکاوی دێته‌ سه‌ر چه‌ند خاڵێک که ناکری خوێنه‌ر هه‌ر وا به‌سه‌ریدا لۆقاو هه‌ڵێنێ و راوه‌ستانێکی له‌سه‌ر نه‌کات.یه‌که‌م کاک سه‌عیدی به‌ڕێز چۆنی زانی ته‌نیا نۆ له‌ سه‌دی (9%) خه‌ڵکی سه‌رده‌شت و سێ له‌ سه‌دی(3%) خه‌ڵکی پیرانشار ده‌نگیان داوه‌ به‌ نوێنه‌ری ئێستای شاره‌که‌یان؟ ئه‌وه‌ی که‌ به‌ فه‌رمی بڵاوبۆته‌وه‌ خیلافی ئه‌وه‌ نیشان ده‌دا.کاکه‌ سه‌عید له‌ پاش کام ده‌رگایه‌ گوێ رایه‌ڵ بووه‌ تا ئه‌و راستییه‌ی بۆ ده‌رکه‌وتووه‌؟ کاکی ئازیز بۆ پێت وایه ته‌نیا که‌ریمیان کاندیداتۆری پارلمان بووه‌،بۆ به‌ رای جه‌نابتان ئه‌و که‌سانه‌ی خۆیان پاڵاوتبوو هیچ قورسایی و بوونێکیان نه‌بووه که‌ ئاوا به‌ چاوی سووک چاویان لێ ده‌که‌ی و به‌ نه‌بوویان داده‌نێی؟

هه‌ر چه‌ند بابه‌ته‌که‌ زیاتر ده‌خوێنییه‌وه‌،ئاڵۆزی و تووڕه‌ی زۆرتر له‌ نێوان پیت و وشه‌کاندا خۆت پێنیشان ده‌ده‌ن.ئێستاش من نه‌مزانی چۆن و بۆ ده‌بێ نوێنه‌ری ئێستای شاره‌کانمان به‌ ته‌نیایی دارێژه‌ر و په‌سه‌ندکه‌ری یاسای پارلمان بێت؟!‌ ئه‌دی ئه‌و 269 نوێنه‌رانه‌ی پارلمان چ کارێکی دیکه‌یان وه‌ خۆ گرتووه که‌ هه‌رچی کاری سه‌خت و دژواره‌ داویانه‌ به‌ که‌ریمیان؟!

برای خۆشه‌ویست لێره‌دا زۆر به‌داخم که‌ ناتوانی سه‌ر هه‌ڵێنی و به سه‌دان خوێنکار،لیسانس،فه‌وق لیسانس و دوکتووڕای شاره‌کانمان ببینی که‌ هه‌ر که‌سیان توانای ‌زۆر زیاتر له‌ چه‌ندان نوێنه‌ری پارلمانه‌‌.وا باشه‌ له‌ سه‌ر ئه‌م زینه‌ بێیه‌ خوار و راستییه‌کان سه‌راوبن نه‌بینی.روانینی جه‌نابتان به‌رانبه‌ر به‌ هاوشاریه‌کانت دوور له‌ راستی و شارستانییه‌تی‌یه‌.شاره‌ دواکه‌وتوو و مه‌حروومه‌کان ئه‌گه‌ر ئاوان یه‌کێک له‌ هۆیه‌کانی بێسه‌وادی و که‌م سه‌وادییه‌،ته‌نیا به‌ بوونی سه‌داقه‌ت و هه‌ستی خزمه‌ت کردن کار ناچێته‌ پێش،تێکۆشه‌ری دڵسۆزی ئه‌میندار ده‌بێ پله‌وپایه‌ی خوێندنیشی هه‌بێ و شاره‌زای کاره‌که‌ی بێت تا بتوانی ئاکامی ئه‌و کاره‌ی پێی ئه‌سپێردراوه‌ به باشی بیگه‌یێنێته‌ ده‌ستی نه‌ته‌وه‌که‌ی.به‌ڵام هیشتا کاکه‌ سه‌عیدی خۆشه‌ویست هه‌ستی نه‌کردووه‌ که‌ ئه‌م جۆره‌ بۆچوونانه‌ زۆر کۆن بوون و ره‌نگ و بۆنێکیان نه‌ماوه‌.

کاکه‌ سه‌عیدی خۆشه‌ویست له‌ نووسیندا وا باشه‌ راست وێژی هه‌بێت نه‌ک راستییه‌کانیش به‌ پێچه‌وانه‌ بنووسین.که‌ریمیان ئێستاش به‌رپرسی فراکسیۆنی نوێنه‌رانی کورده‌ له‌ پارلمان.جا بۆیه‌ من پێموایه ئه‌م برایه‌مان له‌ کۆمه‌ڵی شارستانیه‌تیدا راستییه‌کانی، یان پێی نه‌گێشتووه یان تێی نه‌گێشتووه‌.

به‌م هیوایه‌ که‌ هه‌موومان پێکه‌وه‌ به‌ بێ له‌ به‌رچاوگرتنی قازانچی شه‌خسی بتوانین له‌ پێناو ئاوه‌دانی و پێشکه‌وتنی شار و ناچه‌کانماندا،هه‌وڵ بده‌ین و له‌خۆبردووی نیشان بده‌ین بۆ به‌رژه‌وه‌ندی نه‌ته‌وه‌که‌مان.