له‌گه‌ڵ ئه‌وه‌شدا که‌ به‌ره‌و ژینی مۆدێرن و جیهانی پێشکه‌وتوو وه‌ڕێ که‌وتووین له‌مڕۆدا که‌ چاو ده‌خشێنین‌ به‌ سه‌ر کۆمه‌ڵگای خۆماندا زۆر شت ده‌بینین‌ دوورن له‌وه‌ی که‌ چاوه‌ڕوان ده‌کرا، به‌سه‌ر رابردووی زێڕینی شاره‌که‌ماندا زۆر رابردووه‌ و ئێستایه‌کی پشێوی و داهاتوویه‌کی ناڕوون چاوه‌ڕوانیمان ده‌کات. به‌ پێی ئه‌وه‌ی که‌ مه‌حکووم به‌ ژینی شارستانین و له‌ شاردا ده‌ژین، چاوه‌ڕوانی فه‌رهه‌نگی پێشکه‌وتوو و شعووری به‌رزی شارستانین، یاسای ژین په‌سه‌ند و کێش و هه‌وای له‌باری ئه‌منییه‌تی وه‌ست هه‌موانه‌ که‌ ده‌بێ بۆ ئێمه‌ و به‌ره‌ی داهاتوومان دابین بکرێت و بۆ خۆشمان هه‌وڵی بۆ بده‌ین و په‌روه‌رده‌ی که‌ین تا له‌ داهاتوودا به‌ره‌ی پێگه‌یشتوو له‌ ئێمه‌ و له‌ ژینی شارستانی خۆیان رازی بن. به‌ڵام چه‌ندن ئه‌وانه‌ی که‌وا بیرده‌که‌نه‌وه‌ و بۆ ژینێکی خۆش و شارستانی هه‌وڵ ده‌ده‌ن و خۆیان پێبه‌ندی یاساکان ده‌که‌ن و شانی هیممه‌تی له‌ژێر به‌تاڵ ناکه‌ن؟ به‌ داخه‌وه‌ ئه‌و که‌سانه‌ زۆر که‌من و چه‌پڵه‌که‌شیان ده‌نگی نایه‌ت. هه‌ر چه‌ند کۆمه‌ڵێکی که‌م و دڵسۆز و ئه‌وانه‌ی که‌ خۆیان و بنه‌ماڵه‌که‌یان خۆش ده‌وێت و له‌ بیری داهاتووی باش و له‌باری ژیاندان، هه‌وڵ ده‌ده‌ن و بۆشی به‌په‌رۆشن تا بنه‌مای شارستانیه‌تی له‌ سه‌رده‌شتدا پێک بێننه‌وه‌ و گه‌شه‌ی پێ بده‌ن ناتوانن و باشتر بڵێین ناهێڵن، له‌ ئاکامدا چه‌پڵه‌ی ئه‌و ده‌سته‌ لاواز و ته‌نیایه‌ش به‌ هیچ جۆرێک ده‌نگی ناڕوات و ده‌شاردرێته‌وه‌ و کپ ده‌کرێت.

دارشتن و پێکهاتی هه‌ستی شارستانیه‌تی و بنا‌غه‌ی بوونی شار له‌ رابردووی شاره‌که‌ماندا زۆر کاری جوان و باشی بۆ کراوه‌، باوباپیره‌کانمان به‌ پێی بۆچوونی جوان و کۆمه‌ڵ په‌سه‌ند بنا‌غه‌یه‌کی راست و ره‌وانیان له‌ سه‌ر بنه‌مای داب و نه‌ریتی پێشکه‌وتوانه‌ دارشت و بیر و هه‌ستی خاوێنی شارستانیه‌تیان وه‌به‌ر هێنا تا ئه‌و راده‌ی که‌ توانیان شاری سه‌رده‌شت بۆ داهاتوو سازکه‌ن و شارێک بده‌نه‌ ده‌ستیان تا ئه‌وانیش به‌ باشی بیپارێزن و گه‌شه‌ی پێ بده‌ن تا ژییانێکی خۆش و شارستانی ببێته‌ ئامانجی کاره‌که‌یان.( ئه‌و به‌ره‌ی داهاتوو که‌ ئه‌مڕۆ هه‌یه‌ و هه‌ڵوێستی دوور له‌ شارستانیه‌تی به‌رانبه‌ر به‌ وه‌ی که‌ به‌ده‌ستمان گێشتووه‌!!)

نه‌بوونی که‌مترین پێداویستی ژیان، له‌به‌شی فێربوون و فێرکاری و ده‌رس و قوتابخانه‌وه‌ تا نه‌خۆشخانه‌ و دوکتوور و پارک و فه‌زای سه‌وز و جێگه‌ی حه‌سانه‌وه و گشت ئه‌وانه‌ی پێویستی ژیانی شارستانین له‌لایه‌ک و بۆ خۆمان و بێنه‌زمی و که‌مته‌ر خه‌می و له‌خۆ نه‌پرسینه‌وه‌ و هه‌رکه‌سه‌ بۆ خۆی و بێ فه‌رهه‌نگی و لێکدانی ژینی کۆمه‌ڵێک له‌ دانیشتووانی شار و په‌ره‌پێدانی ئه‌و نه‌ریته‌ ناحه‌ز و دوور له‌ ویژدانه‌ له‌ لایه‌کی دیکه‌وه‌ مه‌ترسی پشێوی زیاتری خستۆته‌ نێو دڵی کۆمه‌ڵانی خه‌ڵکی دڵسۆزی شاره‌که‌مان،ئه‌و مه‌ترسیه‌ش وه‌ها زه‌ق بۆته‌وه‌ که‌ شۆڕای شاریش نه‌یتوانی چی دی بێده‌نگ بێت و له‌ هه‌مبه‌ر ئه‌و کرده‌وانه‌دا بڵاوکراوه‌یه‌کی ده‌رخست و له‌ وێدا ده‌ستی یارمه‌تی بۆ لای خه‌ڵکی به‌ هه‌ستی سه‌رده‌شت راکێشا و داوای یارمه‌تی ده‌کات بۆ جاره‌سه‌ری کێشه‌کانی پێکهاتوو. ئه‌و پشێوییه‌ که‌ به‌ نهێنی و شاردراوه‌ ژینی شارستانیه‌تی له‌ شاره‌که‌ماندا وه ‌مه‌ترسی خستووه‌ و دادێی ئێمه‌ی ناڕوون کردووه‌ و که‌س نازانێ چی لێ دێ و بۆ کوێ ده‌چێت،

* کێشه‌ی نه‌بوونی به‌نزین و سووته‌مه‌نی و شێواوی سه‌فه‌ دوور و درێژه‌کانی ئه‌و پێداویستیانه‌
* هاتنی کچه‌ قه‌ره‌چی و بێماڵه‌کان بۆ سواڵ و مه‌به‌ستی تایبه‌تی خۆیان و سه‌رهه‌ڵدانی شه‌ڕ و هه‌رای پێکهاتوو له‌ مه‌ڕ ئه‌و ژنانه‌
* هێنانی له‌ڕاده‌به‌ده‌ری ماده‌ سڕکه‌ره‌کان و بڵاوکردنه‌وه‌ی ئاسان و بێ مه‌ترسی ئه‌و ماڵوێرانکه‌ره‌ به‌ده‌ستی چه‌ند که‌سێکی بێ ویژدان و خوانه‌ناس
* رێ گری و گرفت نانه‌وه‌ی تاقمێک ناپیاو‌ له‌ سه‌ر رێی ئه‌و میوانانه‌ی که‌ دێنه‌ سه‌رده‌شت و ده‌یانهه‌وێ له‌ سروشتی جوان و دیمه‌نه‌ دڵڕفێنه‌کانی که‌ڵک وه‌رگرن
* هاتووچۆی ماشێنه‌ بێ ژماره و ماتۆرسواره‌کان له‌ شه‌قامه‌کانی شاردا که‌ به‌ ئاشکرا ده‌یانهه‌وێت ئارامی شار لێکده‌ن و هیچ رێزێکیش بۆ هاوشاریان و بگره‌ بۆ خۆشیان دانانێن
* نه‌بوونی چاوه‌دێری ته‌واو له‌ سه‌ر بازار و نرخی پێداویستیه‌کان و گران بوونی باری کێشه‌کان له‌ سه‌ر شانی خه‌لکی شار
* ئاور دانی دارستان و له‌ناوبردنی سه‌رچاوه‌ سروشتیه‌کانی سه‌رده‌شت له‌ لایه‌ن که‌سانێکی بێ ویژدان و جه‌رده‌وه
هه‌موو ئه‌و خاڵانه‌ن که‌ شۆڕای شاری سه‌رده‌شت تازه‌ هه‌ستی پێ کردوون و بۆ چاره‌سه‌ر کردنیان یارمه‌تی خه‌ڵک و کاربه‌ده‌ستانی ده‌وڵه‌تی ویستووه‌.

ئه‌گه‌ر به‌ باشی سه‌رنج بده‌ینه‌ سه‌ر خاڵه‌کانی ناو بڵاوکراوه‌که‌ی شۆڕای شار بۆمان ده‌رده‌که‌وێ که‌ ره‌وه‌ گورگێکی برسی و هار ده‌میان خستۆته‌ نێو گیانی کۆمه‌ڵێک خه‌ڵکی ژیر و پێبه‌ندی یاسا و که‌لتووری شارستانیه‌تی که‌ ده‌یانهه‌وێ ره‌سه‌نایه‌تی بنه‌ماڵه‌ و شاره‌که‌یان بپارێزن و ژینێکی ئاسووده‌ و شارستانیان هه‌بێت، ئه‌وانه‌ی که‌ به‌ بیرێکی جوانه‌وه‌ ده‌ژین و هه‌ستێکی خاوێنیان هه‌یه‌ و رێز بۆ خۆیان و هاوشاریه‌کانیان داده‌نێن که‌وتوونه‌ ناو کێژاوێکی پڕ مه‌ترسی له‌ لایه‌ن ئه‌و ره‌وه‌ هێرشکه‌ره‌.

به‌ڵام کێ ده‌بێ پێش به‌و گه‌رده‌لووله‌ بگرێ و نه‌هێڵێ له‌وه‌ زیاتر شار به‌ره‌و نه‌مان و پشێوی به‌رێت؟ کۆمه‌ڵێک که‌ خۆشیان گیرۆده‌ی ئه‌م گرفتانه‌ بوون؟ یان کاربه‌ده‌ستانی ده‌وڵه‌تی؟ یان ئه‌وه‌ی که‌ ده‌بێ له‌ هۆکاری پێکهاتنی ئه‌و حاڵه‌ته بکۆڵدرێته‌وه‌ و چاره‌سه‌ری سه‌رچاوه‌ی کێشه‌کان وه‌ها بکرێت که‌ دووباره‌ نه‌بنه‌وه‌؟

به‌و هیوایه‌ که‌ ئێمه‌ش بتوانین وه‌ک کۆمه‌ڵانی پێشکه‌وتوو له‌ زێد و مه‌ڵبه‌ندی باوباپیره‌کانماندا به‌ ئاسووده‌یی بژیین و که‌س نه‌بێته‌ هۆی پشێوی ژییانمان.

سه‌رچاوه‌کان:
بڵاوکراوه‌ی شۆڕای شاری سه‌رده‌شت (عاقبت شهر سردشت به كجا ختم ميشود)