ئه‌و میوانانه‌ چه‌ند موسوڵمانی به‌لوچ بوون که‌ له‌ وڵاتی خۆیان به‌ مه‌به‌ستی سه‌فه‌ر و ده‌رچوون له‌ شاره‌که‌یان به‌ره‌و وڵاتی ئێمه‌ هاتبوون و له‌ مزگه‌وته‌کاندا ده‌مانه‌وه‌ و خه‌ریکی کاری خۆیان ده‌بوون،رۆژانه‌ بۆ ئامۆژگاری خه‌ڵک و شه‌وانه‌ش بۆ پاڕانه‌وه‌ و نزیک بوونه‌وه‌ له‌ خوای گه‌وره‌.ئه‌و چه‌ند که‌سانه‌ سه‌ر به‌ جه‌ماعه‌ت ته‌بلیغ بوون که‌ کاریان ته‌بلیغی به‌رنامه‌کانی ئایینی ئیسلام و قوڕئانی پیرۆز به‌ شێوه‌یه‌کی جوان و رێک و پێکه‌، شار و ناوچه‌ی ژیانیان چێ دێڵن و به‌ شێوه‌ی کۆچکه‌ر و رێبوار دور له‌ سات و سه‌ودای بازاڕی رۆژانه،‌ شار به‌ شار ودێ به‌ دێ به‌ دوای ئاره‌زۆی دڵی پڕ له‌ لێدان و جه‌زبه‌ی پڕ له‌ خۆشه‌ویستی و عیشقی خواپه‌ره‌ستیدا ده‌گه‌ڕێن و ته‌نیا له‌ بیری ئه‌وه‌دان و هیچ بیر و هۆشێکی لاوه‌کی نایاندا به‌ لاڕێدا.

جه‌ماعه‌ت ته‌بلیغ بۆ یه‌که‌م جار له‌ بیری بیرمه‌ندێکی سۆفی که‌ په‌روه‌رده‌ی حوجره‌ی خانه‌قا بوو سه‌ری هه‌ڵدا و بوو به‌ مه‌کته‌بی خۆپارێزی و په‌ره‌پێدانی به‌رنامه‌ جوانه‌کانی ئیسلامی پیرۆز،مه‌ولانا ئه‌لیاس له‌ وڵاتی هیندوستان له‌ خانه‌قاکه‌ی خۆیه‌وه‌ کاتێک که‌ هه‌ستی به‌ پێویستی ئه‌م بیره‌ کرد،به‌لێ هاتوویی و پشت گه‌رم بوون به‌ خوای گه‌وره‌ هه‌ستا و وه‌ک یه‌که‌مین که‌س بۆ بڵاوکردنه‌وه‌ی دووباره‌ی ئیسلام و هه‌ستی موسوڵمانی راسته‌قینه،‌ قۆڵی هه‌ڵماڵی و به‌ردی بناغه‌ی جه‌ماعه‌ت ته‌بلیغی دانا و به‌وپه‌ڕی له‌خۆ بردوویی و ماندوونه‌ناسانه‌ شه‌و و رۆژ بۆ په‌ره‌ پێدانی خه‌ریک بوو، مۆمێک که‌ له‌ خانه‌قایه‌که‌یه‌‌وه‌ هه‌ڵی کرد ئه‌مڕۆ له‌ 246 وڵاتدا تیشک ده‌خاته‌ ناو دڵی موسوڵمانان‌ و مه‌کته‌بی مه‌ولانا شێخ ئه‌لیاس ده‌بێته‌ هه‌وارگه‌ی عاشقان و شه‌یدا و سه‌رمه‌ستانی هه‌ستی خۆ ناسی و خواپه‌ره‌ستی.

محه‌ممه‌د مالیک یه‌کێک له‌و جه‌ماعه‌ته‌ بوو که‌ ده‌یگووت:ئێمه‌ له‌ 220 وڵاتدا به‌ شێوه‌ی فه‌رمی مه‌رکه‌زی ته‌بلیغمان هه‌یه‌ و له‌ 246 وڵاتیشدا کار ده‌که‌ین، ئێمه‌ تێده‌کۆشین و هه‌وڵ ده‌ده‌ین تا ئه‌و به‌رنامه‌ی که‌ خوای گه‌وره‌ پێی رازییه‌ له‌ خۆماندا زیندووی که‌ینه‌وه‌ و گه‌شه‌ی پێ بده‌ین،ئێمه‌ به‌ په‌یڕه‌وی و به‌جێ هێنانی چه‌ند ئه‌سڵێک بۆ گه‌یشتن به‌ ئامانجه‌کانمان تێ ده‌کۆشین،گه‌شت ده‌که‌ین و له‌ وڵاتی خۆمان ده‌چینه‌ ده‌ره‌وه‌ و ئازار و زه‌حمه‌ته‌که‌ی به‌ گیان هه‌ڵده‌گرین،ته‌علیم ده‌بینین و فێر ده‌بین و بۆ زانین تێده‌کۆشین،له‌ گه‌ڵ زانایان و پیاو ماقووڵ و شاره‌زایان داده‌نیشین و پرسیار و مه‌شوه‌ره‌تیان له‌ گه‌ڵدا ده‌که‌ین،رۆژانه‌ چه‌ند کاتژمێرێک ده‌چینه‌ مزگه‌وت و له‌وێدا ده‌مێنینه‌وه‌ و له‌ حه‌فته‌دا سێ رۆژ بۆ ته‌بلیغ ده‌گه‌ڕێین. له‌سه‌ر ئه‌و به‌رنامه‌یه‌ به‌رده‌وام ده‌بین و هه‌وڵی بۆ ده‌ده‌ین تا ده‌گه‌ینه‌ ئامانج که‌ فێری ته‌علیم و ته‌ربییه‌ت ده‌بین، تا ده‌توانین به‌ باشترین شێوه‌ خه‌ڵک بۆ لای خوای گه‌وره‌ راکێشین،تا زکر و بیری خۆمان تایبه‌ت به‌ خوای گه‌وره‌ ده‌که‌ین و ده‌چینه‌وه‌ سه‌ر رێگه‌ی شانازی و به‌ مراد گه‌یشتن،تا ده‌توانین به‌و‌ شێوه‌یه که‌ خوای گه‌وره‌ و پێغه‌مبه‌ری مه‌زن (د.خ) پێی رازین، له‌ گه‌ڵ هه‌موو گیان له‌به‌رێک هه‌ڵسووکه‌وت بکه‌ین، تاده‌گه‌ین به‌ جوانترین ئه‌خلاق.

وه‌ک بۆخۆیان ده‌ڵێن جه‌ماعه‌ت ته‌بلیغ پێک هاتووه‌ له‌ کۆمه‌ڵه‌ موسوڵمانانێک‌ له‌ سه‌ر رێگه‌ی وه‌سه‌ت واتا ئیسلامی راسته‌قینه،‌ که‌ دژی هه‌ر جۆره‌ تووندئاژۆیی و کاری تیرۆریستین با به‌ نێوی جیهادیش بێت، وه‌ له‌ گه‌ڵ هیچ حیزب و لایه‌نێکی سیاسی _ ئیسلامی ئاژاوه‌گێڕ نین و لێیان بێزارن.له‌ راستیدا سه‌رچاوه‌ی ئه‌و راپه‌ڕینه‌ زۆر روون و جوان بووه‌ و تا ئێستاش وه‌ک له‌ ناو ئێمه‌دا هه‌ن و ده‌یانبینین له‌ سه‌ر رێگه‌ی گه‌وره‌پیاوه‌کانیان ماونه‌وه‌ و درێژه‌ده‌ری بیری وانن، ئێمه‌ش ئاواته‌ خوازین هه‌روا درێژه‌ده‌ری رێگه‌ی وه‌سه‌تی ئیسلامی راسته‌قینه‌بن و به‌ لاڕێدا لایاننه‌ده‌ن و توشی حیزبایه‌تی سیاسی و ... نه‌بن.