شاری سه‌رده‌شتیش یه‌کێکه‌ له‌و شارانه‌ که‌ پێویستی به‌ دابین کردنی سه‌ره‌تایی ترین پێداویستیه‌کانی ژیانه‌ و ده‌بێ وه‌ک ناوچه‌یه‌کی زۆر لێقه‌وماو و دواکه‌وتوو له‌ بواری نه‌بوونی ئیمکاناتی پێویستدا کاری بۆ بکرێت.هه‌ر چه‌ند وه‌ک سه‌رده‌شتییه‌کی دانیشتووی ئه‌و شاره زۆر جار چاو ده‌گێڕم تا بزانم چ هه‌یه‌ و چ کراوه‌ بۆ سه‌رده‌شتی لێقه‌وماو به‌ راستی هیچ شتێک نابینم که‌ بۆ ژیانێکی مامناوندیش له‌ شارێکدا پیویسته‌،جا له ‌که‌مڕا بگره‌ تا زۆر.

له‌ کۆمه‌ڵگای ئیسلامیدا شوێنێک وه‌ک مزگه‌وتی گه‌وره‌ بۆ به‌جێ هێنانی نوێژی جومعه‌ گه‌وره‌ترین پێویستی ژیانه‌ که‌ ده‌بێ بۆ دیاری کردنی شوێنێکی تایبه‌ت و دروست کردنی مزگه‌وت په‌له‌ی لێ بکرێت،چوونکه‌ نه‌بوونی ده‌بێته‌ هۆی لێکدابڕان و په‌رت و بڵاوی خه‌ڵکی دیندار،مزگه‌وتی سوور له‌ سه‌رده‌شتیش هه‌ر له‌ سه‌ره‌تاوه‌ وه‌ک مزگه‌وتی گه‌وره‌ ناسراوه‌ و بۆته‌ شوێنی به‌جێ هێنانی نوێژی جومعه‌،چه‌ند جارێکیش له‌ لایه‌ن خه‌ڵکی موسوڵمانی سه‌رده‌شتی جاکسازی کراوه‌ته‌وه‌ و بۆ ئه‌وه‌ی که‌ پێویست بووه‌ گه‌وره‌ش کراوه‌،هه‌ر چه‌ند ئاماده‌بووانی نوێژی جومعه‌ی شاری سه‌رده‌شت له‌ نێوان هه‌موو شاره‌کانی کوردستانی ئێراندا به‌ پێی رێژه‌ی دانیشتوانی،هه‌میشه‌ پله‌ی یه‌که‌می پێ بووه به‌ڵام مزگه‌وتی سوور بۆ چه‌ند ساڵێکی دیکه‌ش ده‌یتوانی وه‌ڵامده‌ره‌وه‌ی سه‌فه‌ درێژه‌کانی نوێژی جومعه‌ بێت،له‌گه‌ڵ ئه‌وه‌شدا له‌ ساڵی 1374 ی هه‌تاوی له‌ لایه‌ن لیژنه‌ی ئۆمه‌نا و لیژنه‌ی په‌ره‌پێدان (هیئت امناء و هیئت توسعه‌) ی مزگه‌وتی سووره‌وه‌ کۆڕێک گێرا بۆ سازکردنه‌وه‌ی ئه‌و مزگه‌وته‌ و به‌رنامه‌ و نه‌خشه‌یان بۆ گرت تا مزگه‌وته‌که‌ هه‌ڵوه‌شێنن و له‌ جێی وی مزگه‌وتێکی باشتر و گه‌وره‌تر و جێدارتر به‌ شێوه‌ی ئه‌وڕۆیی سازکه‌نه‌وه،هه‌ر چه‌ند له‌ سه‌ره‌تای دانیشتنه‌کانڕا‌ پێشنوێژی جومعه‌ مامۆستا سه‌لامی ئه‌مینی وه‌ک به‌رپرسی لیژنه‌ی پره‌پێدانی مزگه‌وتی سوور به‌و به‌رنامه‌یه‌ ناڕازی بوو و پێی وابوو که‌ ئه‌و کاره‌ پێویست نی‌یه،به‌ڵام له‌ ساڵی 1381 ی هه‌تاویدا ده‌ستیان به‌ هه‌ڵوه‌شاندنی مزگه‌وته‌که‌ کرد و به‌په‌له‌ و شه‌و و رۆژ خه‌ریکی کارکردن بوون تا پرۆژه‌ی دروستکردنه‌وه‌ی مزگه‌وته‌که‌ زووتر ته‌واو بێت،به‌ڵام له‌گه‌م ماندوویی و زه‌حمه‌تێکی زۆر،کاره‌که‌ تا ئه‌و جێیه‌ پێش که‌وت که‌ هه‌ڵوه‌شاندنی مزگه‌وته‌که‌ و لابردنی که‌ره‌سه‌که‌ی ته‌واو بوو،به‌دوای ئه‌وه‌دا کاره‌که‌ راوه‌ستا و سێ ساڵ هه‌روا ماوه‌، تا ساڵی 1383 ی هه‌تاوی کاری دروست کردنی بناغه‌ی مزگه‌وتی سوور ده‌ستی پێ کرد و به‌ خۆشیه‌وه‌ به‌ دوای چوار ساڵ جومعه‌ی په‌رت و بڵاو کردن له‌ سالی 31/03/1384 ی هه‌تاویدا به‌ هیممه‌تی 176 / 284 / 229 تمه‌ن یارمه‌تی خه‌ڵکی سه‌رده‌شت و ناوچه‌ فازی یه‌که‌م که‌ ته‌نیا ژێرزه‌مینی(زیر زمین) مزگه‌وته‌که‌یه‌‌ ته‌واو بوو و نوێژی جومعه‌ دووباره‌ هاته‌وه‌ مزگه‌وتی سوور‌.

له‌گه‌ڵ ئه‌وه‌ی که‌ نزیک به‌ 230 ملوێن تمه‌ن له‌ سه‌ره‌تای کار را بۆ دروست کردنی فازی یه‌که‌م خه‌رج کراوه‌ وه‌ک ده‌ڵێن ئه‌و شوێنه‌ی که‌ لێی دروست کراوه‌ هه‌ڵگری پڕۆژه‌یه‌کی وه‌ها گه‌وره‌ نی‌یه ‌و ئه‌وه‌ی که‌ دروستیش کراوه‌ کاری هه‌ڵه‌ی زۆر تێدایه‌ که‌ده‌کرا باشتر له‌وه‌ بوایه.

به‌ دوای کرانه‌وه‌ی مزگه‌وته‌که و پڕوپاگه‌نده‌ کردن بۆ خڕکردنه‌وه‌ی دووباره‌ی یارمه‌تی ماددی بۆ درێژه‌پێدانی کاری سازکردنی بینای مزگه‌وتی سوور و یارمه‌تی 175 ملوێن تمه‌نی خه‌ڵکی موسڵمان و ئیداره‌ ده‌وڵه‌تیه‌کان،به‌ پێی بڵاوکراوه‌ی هه‌یئه‌تی بازسازی‌ مزگه‌وتی سوور،به‌داخه‌وه‌ تا ئێستا هیچ کارێکی تازه‌ نه‌کراوه‌ و وادیاره‌ ئه‌و ساڵیش هیچ کارێک ناکرێت و ده‌بێ چاوه‌ڕوانی هاتنی ساڵی نوێ بین بۆ ده‌ستپێکردنی دووباره‌ی کار له‌ مزگه‌وته‌که‌دا هه‌ر چه‌نده‌ بۆ ته‌واو بوونی مزگه‌وتی سوور ده‌بێ چاوه‌ڕوانی سه‌دان ملوێن تمه‌ن یارمه‌تی دووباره‌ی خه‌ڵکی سه‌رده‌شت له‌ ساڵانی داهاتوودا بین به‌ڵام چه‌نده‌ و چه‌ند ساڵه‌که‌ی خوا ده‌زانێ.

خوا جه‌زای هه‌مووی ئه‌و که‌سانه‌ داته‌وه‌ که‌ له‌و پڕۆژه‌یه‌دا به‌ بێ چاوه‌ڕوانی و ماندوونه‌ناسانه‌ شه‌و و رۆژ کارده‌که‌ن و له‌ بیری ئه‌وه‌دان که‌ هه‌رچی زووتر کاره‌که‌ کۆتایی پێ بێت.

سه‌رچاوه‌:
1- بڵاوکراوه‌کانی لیژنه‌ی په‌ره‌پێدانی مزگه‌وتی سووری سه‌رده‌شت