ئەمڕۆ كه چەند ساڵێك له كرانەوەی ئەو زانكۆیه تێدەپەڕێ گرفتی ماددی بەرچاوترین كۆسپی سەر ڕێیانه كه ئێستاش نەیانتوانیوه شوێنێكی تایبەت بە خۆ دابین بكەن و هەروا به هومێدی كۆمەك و یارمەتی خەڵكی خێرخوازن و به هەموو شێوەیەك پڕووپاگەنده بۆ ئەو كەسانه دەكەن كه یاریدەریانن و پێداویستیەكانی زانكۆیان بۆ دابین دەكەن.

له رۆژی 27 ی خاكەلێوەی هەشتاوپێنج دا بەڕێوەبەرانی زانكۆی (پیام نور) ی سەردەشت له بانگهێشتێكدا رێوڕەسمێكی تایبەتیان بۆ ساڵڕۆژی له دایكبوونی پێغەمبەری خۆشەویست حەزرەتی محەممەد (د.خ) پێكهێنا و بۆ ئەوەی كه بتوانن هەرچی زۆرتر دانیشتوانی شار و ناوچه بۆ ئەو كۆڕه راكێشن دەستیان دایه بڵاوكردنەوەی نووسراوە و بڵاوكراوه له لاپەڕی گەورەی رەنگیدا و هەر دووكان و شوێنێك كه جێگەی هەبایه نووسراوەیەكت تێدا وەبەر چاو دەكەوت،به وتەی وێبلاگی(شهر من سردشت)دەبێ كاری بانگهێشتن و نووسراوه بڵاوكردنەوه تەنیا بۆ شاری سەردەشت نەبووبێ بەڵكوو له تەواوی وڵاتی ئێراندا كرابێ و گەورە پیاوان و خەڵكانیان بانگهێشتی ئەو كۆڕوكۆبوونەوه كردبێ،رێوڕەسمەكه له كاتژمێری 10 ی بەیانی تاكوو 4 ی ئێوارەی رۆژی یەك شەممه له مزگەوتی سوور(جامعه) بەڕێوه چوو.

ئەوەی لێرەدا سەرنج راكێشه ئەوەیه كه زانكۆی (پیام نور) ی سەردەشت (وەك دەڵێن) بە هۆی نەبوونی ئیمكاناتی ماددی،بۆ خۆی چۆن توانیویەتی خەرجی ئەو رێوڕەسمه بدات! یا دەبێ كام پیاوه دەست و دڵ ئاوەڵه خانەخوێی میوانەكانی بەرپرسانی زانكۆ بووبێت و نەیهێشتبێت باری گرفتی ماددی زانكۆ لەوەی كه هەیه زیاتر بێت؟

یا ئەرێ ئەو كاره له راستیدا بۆ ئەوڕۆ پێویست بوو،نەدەكرا رێوڕەسمەكه بۆ ساڵانی داهاتوو بایە و ئێستا له هەوڵی چارەسەر كردنی گرفتەكانی نێو زانكۆدا بووبان،پێم وایه ئەو كاره رووحی خۆشەویستی خوای زۆرتر لەوەی كه كردیان شادتر كردبایه.

پرسیار له بەڕێوەبەرانی زانكۆی(پیام نور) لێرەدا شتێكی ئاسایی و پێویسته بكرێت،ئەرێ ئەو بانگهێشتەی كه پێكتان هێنا و بە قەولی بەڕێز ئازەری (اقدامی جسورانه) ی ئێوه چ دەسكەوتێكی له باری ماددی و مەعنەویدا بۆ زانكۆی (پیام نور) ی شارەكەمان هەبوو؟ ئەرێ توانیتان گۆشەیەك له پێداویستیەكانی زانكۆی پێ دابین بكەن؟ ئەرێ بەو هەموو خەرجی و زەحمەت و خەڵك كۆكردنەوه و گەوره پیاو بانگ كردنه توانیتان تەنیایەك مامۆستای زانكۆ بۆ سەردەشت راكێشن؟ ئەرێ ئەو گەوره پیاو و مامۆستا زانكۆیانەی بانگهێشت كرابوون چ شتێكی بەكەڵكیان له باری زانست و فێربوونەوه بۆ خوێندكارانی زانكۆكەمان به دیاری هێنابوو؟ یان ئێوەی بەڕێز توانیتان وابكەن ئەو دڵه ئیقیانووسییەی ئامادەبوان بۆ تەنیا رۆژێك، بۆ زانكۆی (پیام نور) ی سەردەشت لێبدات؟

به هومێدی ئەو رۆژەی كه زانكۆی (پیام نور) و زانكۆی ( آزاد اسلامی) - كه له حاڵی دامە‌زران دایه- بتوانن خزمەت به وڵات و گەلەكەیان بكەن و ببنه چرای رێگەی فێربوونی خوێندكاران و دانیشتوانی شارەكەمان سەردەشت و بەڕێو‌ەبەرانیشیان ببنه نمونەی خزمەت كردن و لەخۆ بردوویی.

بەو هیوایه